بناء الجسور

أنا مرتبطة بواحد عاطفياً من 3 سنين كنا ساعتها في سنة أولى كلية، إحنا الاتنين في سن بعض، وعلشان كده إحنا مع بعض على طول في كل مكان بس أنا من محافظة وهو كان من محافظة تانية، فكنت باروح الكلية كل يوم ونتقابل هناك، حتى كان كمان بيشرح لي أي حاجة مش فاهماها وكان بيوصلني الموقف كل يوم، هو ليه أخ أكبر منه بسنة وكنا متفقين إن في الإجازة دي لازم يقول لأهله كل حاجة، لكن أخاه سبقه وقال لهم إنه بيحب وعايز يخطب، لكن أهله أول ما عرفوا إنه عايز يتجوّز البنت اللي بيحبها اعترضوا بشدة ورفضوا .
بعد كده الولد اللي مرتبطة بيه قال لهم إنه عايز يتجوز برضه البنت اللي بيحبها فاعترضوا برضه ورفضوا وقالوا إنهم لا يمكن يرضوا إن أولادهم يتجوزوا بنات بيحبوهم وكمان من الجامعة؛ لأن أخلاق البنات دي بتبقى مش كويسة وبعدين والدهم خاصمهم وكان الولد اللي أنا مرتبطة بيه بيتكلم مع والدته بخصوصنا، فقالت له إنها مش مقتنعة بيّ؛ لأن أكيد أخلاقي مش كويسة؛ لأني كنت بحبه وسألته إذا كنت خرجت معاه بره الجامعة؟؟ فهو قال لها أيوه كنت بوصلها الموقف علشان المواصلات بتبقى زحمة، فقالت له إن والده كان عارف؛ لأن في ناس قالوا له إن ابنه بيشوفوه في الشارع مع واحدة، ومش ممكن أبدا والده يوافق على كده وإن هي كمان مش مقتنعة بجوازي منه مع إننا والله محترمين جدا وما فيش أي حاجة حصلت مني وحشة وأخلاقي كويسة ومن عيلة محترمة وكبيرة، أنا مش عارفة أعمل إيه ولا أقول له إيه؟!!

مع العلم إنهم قالوا لأخيه نفس الكلام وأخوه برضه بيسافر لكليته والبنت اللي مرتبط بيها من محافظة غير محافظته يعني إحنا الاتنين نفس الظروف والمشكلة واحدة، إحنا عايزين نحل الموضوع وعايزين بعض؛ لإننا بنحب بعض جدا نعمل إيه إحنا الأربعة وبالذات أنا والولد اللي بحبه نعمل إيه وهو يعمل إيه؟؟ مع العلم إن والده ووالدته بالمعنى العام دماغهم ناشفة نعمل إيه أرجوكم إحنا بنتعذب كل يوم هو يتصرف معاهم إزاي؟؟ وأنا إيه دوري في الموضوع؟؟ مع العلم إني مش حاسة إني عملت حاجة غلط؛ لأن علاقتنا كانت في حدود ومحترمة وياما ناس أقل احتراما مننا اتجوزا.. أرجوكم فيدوني.
s.

للأسف المشكلة دي بتقابل ناس كتير جدا، وبيكون سببها الأساسي صراع الأجيال؛ لأن أهلنا من جيل مختلف ومروا بتجارب مختلفة عن تجاربنا وبالتالي حكمهم على تصرفاتنا نابع من رؤية مختلفة عن رؤيتنا.
والمشكلة دي بتخلينا جوه البيت الواحد بنعيش وكأننا في جزر منعزلة، وأنا حابة تشبيه الجزيرة ده؛ لأن الإنسان بيكون منفصل بآرائه واختياراته عن كل اللي حواليه ومتخيل إن لازم الشخص الآخر هو اللي يوصله، وإنه لازم يفضل ثابت في مكانه وعلى موقفه ولا يتحرك. بس الوضع ده مش هيخلي أي طرف يوصل للي هو عاوزه.
والحل في فكرة بناء الجسور بنا وبين بعض، محاولة إن كل واحد يتحرك في اتجاه التاني، ولأن أنتم الأبناء وأنتم الأصغر في السن يبقى لازم تضحوا شوية وتيجوا على نفسكم؛ لأن كبرياء الكبار هتمنعهم إنهم يتنازلوا عن رأيهم بسهولة.
الموضوع ليس سهلا، وسيحتاج الكثير من الوقت والجلسات الودية بين الولدين ووالديهم وأحياناً جلسات منفصلة مع الأم على حدة والأب على حدة ومحاولة التأثير عليهم، وتوصيل الفكرة وهي أن البنات الذين يودون الارتباط بهم فتيات محترمات ومتعلّمات.
اجلسي معه وأحضري ورقة وقلم وعددي المزايا التي يراها فيكِ والمزايا التي ستنتج عن علاقتكما سوياً، وبعد إحساسكما أنكما مقتنعان تماماً بحب كل منكما للآخر، فاتفقا بعد ذلك على الوقوف والدفاع عنه بالحسنى وبالإقناع وبتقديم كل خير للأهل، وربنا يوفقكم.