السر في كلمة السر

السلام عليكم ورحمة الله بجد موقع جميل للشباب أحب أولا أشكركم عليه بالنسبة لمشكلتي أنا عندي 22 سنة، كنت زمان أيام الكلية على طول قاعدة على النت وباكلم ناس وكده، ولكن بغرض التسلية مش أكتر، والحمد لله مش باتخدع بكلام الشباب اللي أغلبهم بيتسلّوا.

المهم أني حاليا مخطوبة لشخص الحمد لله على قدر كبير من الأخلاق وبيحبني وهو بيعمل في مجال الكمبيوتر وكده، وفي مرة في كلامنا قال لي إنه كان ليه إيميل غير اللي بيكلمني عليه قلت له وأنا كمان عادي في وسط الكلام وعدى الموضوع المهم إنه رجع تاني يسألني على الإيميل بتاعي وعايز ياخده هو والباسوورد. أنا رافضة الموضوع مش علشان حاجة؛ الإيميل مش عليه حاجة أخاف إنه يعرفها أو كده كل الموضوع إنه طلبه ده وإنه يعمل مشكلة على إني رافضة أدي له الإيميل بيحسسني إنه شاكك فيّ والإحساس ده بيضايقني جدا هو مش فاهم ده هو حاسس إن فيه حاجة أنا مخبياها. هو ما قالش كده مباشرة إنما حاجة معروفة، أنا عارفة إني غلطانة في إني قلت له إنه كان ليّ إيميل بس ده خلاص حصل، بس هل أنا غلطانة في إني مش عايزة أديهوله يا ريت تقولي لي أعمل إيه وأديله الإيميل ولّا لأ؟ وآسفة إني طولت عليكم.
منى