م الآخر| اعرف خوفك وعلم عليه

"مين هيدخل معايا سينما؟"
– كله رد "يلا بينا"
-أنا "فيلم رعب؟"
–"إنسي!.."
دايما مش لاقية حد يدخل معايا فيلم رعب ولا حد يتفرج معايا بالليل. بتفرج لوحدي والنور مطفي و مبخافش، بمشي جنب أي كلب شرس في الشارع وبضحك علي صحابي وهما بيجروا من قدامه علشان خايفين.
إزاي أنا جامدة كدة؟ ممكن أمشي لوحدي في شارع ضلمة وميهمنيش، ولو حد عاكسني بشتمه، ولو كسر عليا وأنا سايقة بكسر عليه.
LOL.. دخلنا فيلم رقص.
- "فاكرة لما كنتي بترقصي باليه؟" – أنا: "آه" -"و سبتيه ليه؟" – أنا: "عادي".
وعادي دي وراها كلمة واحدة بترن في وداني أنا بس.. "الخوف".
السبب الحقيقي إني كنت بخاف من المدرب لما بيزعق، والبنات تتريق عليا لو وقعت.
"بخاف؟!" ..أمال مين شجيع السيما ده؟!
بس ده كان زمان.
مش ده كان الشهر اللي فات؟؟ أمال مقدمتيش ليه على ال New Job position؟
آه بخاف.. بخاف من الحياة.. من الناس.. من الخسارة.. من الإحساس بالرفض.. من المجتمع.. من الفشل.. من التغيير.. من التحدي.. من التعبير.. من المستقبل.. بخاف من الاعتراف إني بخاف.
كام مرة حد فينا خاف من الاعتراف بخوفه وكانت الإجابة "عادي"؟؟
وقعدت ساعات تنظم أفكارك.. سيجارة ورا سيجارة ورا سيجارة.. تتدخل تتلجلج.. حاسس إنه بيقيمك؟ رحت Interview؟
أكيد ده فاهم أكتر منك.. خوفك سيطر عليك و لجمك.
كملتي قد إيه في علاقة فاشلة وخوفك من الوحدة منعك إنك تنهيها؟
كام مرة حاولت تقلدهم علشان خايف تخسرهم؟
كام مرة غيرتي لبسك وتسريحة شعرك قبل ما تنزلي علشان خايفة يقولوا عليكي مش ستايل؟
اشتغلت في شركة ونسيت المشروع اللي نفسك تعمله؟ خايف يفشل؟ مش مضمون؟
دخلتي أسنان وانتي عايزة فنون؟ خفتي تواجهي أهلك؟ مفيش مستقبل؟
الخوف جوانا كلنا بأشكال مختلفة.. كل حاجة بنعملها واحنا مش عايزين.. كل حاجة كان نفسنا نعملها ومعملناهاش... كان الدافع الوحيد "الخوف".. الخوف هيتملكك..هيتحكم فيك..هيوقعك، وانت فاكر نفسك أجمد واحد علشان ركبت الصاروخ، وعملت Bungee jumping.. وشربت سيجارتين وإزازة BEER.. شتمت واحد في الشارع ورزعت سواق الميكروباص علي أفاه؟!!
خوفك لسه جواك..
حد قالي زمان "الخوف يا نستسلمله.. يا نتجاهله.. يا نواجهه".
وأنا اخترت إني أواجه خوفي..وانت؟!
اعرف خوفك إيه.. وعلم عليه.