م الآخر| إحساس.. بس لأول مرة

أحسن أحساس ويمكن يكون أكتر أحساس مختلف هو أول أحساس "أول مرة"..
أول مرة تعمل فيها أي حاجة، بتحس بشعور غريب وأحاسيس جواك تحاول تحسها تانى ممكن متعرفش، وممكن تروح خالص، وممكن تزيد مع ناس.
بس حبيت أكتب عن بعض الأحاسيس اللي ممكن نعدي بيها واللي أنا عديت بيها، وكل ما أكون في مكان أو أشوف شخص أفتكر أول إحساس، أو بمعنى أصح أول مرة.
فاكر أول مرة حفظت الفاتحة وسمعتها لوحدي، ولحد النهاردة فاكر إني حفظتها من الراديو من غير ما حد يحفظهالي، وكأن ربنا اللي حفظهالي.
أول بنت أعجبت بيها وهى طبعا جارتي، وكنا في ابتدائي، وكنت شايفها أحسن بنت في الدنيا، دلوقتي بقول سلامة نظري.
فاكر لما نجحت في إعدادي وجبت مجموع ثانوية عامة، ودي أول مرة أحس إني ناجح وشاطر ومقبول وأشوف دا في عيون الناس.
أول يوم أروح فيه الجامعة كنت مبسوط لدرجه إني كنت بعد الساعات علشان أروح تاني.
فاكر جدا قراري بأنى أسيب كلية تجارة، وأول مرة أحس إني بعمل حاجة صح رغم اعتراض الكل، وأول مرة أحس إني سيد قراري، وأول مرة أخاف أوي من ضياع السنين.
إحساسى كمان أول مره حضرت ل دكتور إبراهيم الفقي في ساقية الصاوي، وشوفته وهو نازل من على سلم قاعة النهر والناس بتسقف قوي، وحلمت لأول مرة بمستقبلي.
كمان فاكر أول مرة وقفت على مسرح "مسرح الغد"، وأنا ممثل والإحساس المختلط، لما سيبت التمثيل كنت فرحان لأني حاسس إني برضي ربنا وزعلان إني أسيب حاجة ممكن تكون فيها موهبتي.
إحساس عجيب وغريب أول مرة اشتغلت في فندق وكان نفسي أشتغل جدا حتى لو ببلاش، ومع ذلك رفضت أقدم خمور، فكان الحل أرجع بيتنا، كنت راجع سعيد قوي، وأول مرة أحس بمعنى "من ترك شيئا لوجه الله عوضه خيرا منه".
أول مرة أقف قدام الناس وأتكلم، شعور خوف مع تحدي مع توهان، بس شعور أول مرة أحس بيه.
أول مره الناس تسقفلي كنت مبسوط جدا، لكن دلوقت بقى عادي، بالعكس بخاف من السقفة لأنها لحظية وتخوف لو أتعودت عليها.
أول مرة أحس يعني إيه حد مؤمن بيك أكتر منك (وليد حماد) وإحساس الصداقة اللي بجد.
أول مرة أحس بالسعادة بدون سبب واضح لما دربت في إسكندرية.
ودلوقت راجع حياتك وإحساسك بأول مرة، وقرر تحس بإحساس التخلي عن الذنب سواء عملته أو في ذهنك وتمتع بأحساس أول مرة.