لازم يكون في مادة في الدستور تسمح لنا نقول "كلام قبيح"

مبدئيًا أنا معترض على الدستور، وليا أسبابي:-
مش لأني ضد الإخوان على طول الخط، ولا لأني مش حابب "حكم العسكر"، لأن الاتنين من وجهة نظري واحد، بس ده بدقن وده ببدلة كاكي.
وطبعًا الدستور فيه مواد كتير كويسة ومواد مش كويسة وفيها اختلافات بين الفقهاء وأصحاب الرأي أنا ماليش دعوة بكل الهري ده.
أنا اللي مخليني منضم لمعسكر اللي هيقولوا "لا" هو:
مفيش مادة تسمحلنا إننا نقول على الأقل من 5 إلى 10 كلمات قبيحة في اليوم دون الوقوع تحت طائلة القانون.
يعني لما سوّاق التاكسي ما يبطلش رغي ويقرف أهلك ده مش لازم له على الأقل كلمة قبيحة؟
ولما مديرك في الشغل يخنق عليك ويضايقك ويقرفك وهو أصلا "حمار"، مش واجب بردو كام كلمة كدة على ما قُسم؟
ولما زميلك يدخل برخامته وياخد آخر سجارة في علبة السجاير بتاعتك، ده ما ينفعش معاه إلا كلمة قبيحة الصراحة.
لما تشوف في حوادث وناس بتموت على الطرق وعلى السكك الحديد بسبب إهمال الحكومة، والوزير يطلع يقول "الميت هياخد
كام والمصاب هياخد كام"، بذمتك لازم تخرج اللي جواك بقباحة؟
لما نشوف الأتوبيسات فيها "واي فاي" وهي ماشية في الشوارع في ناس جنبها مش لاقيين ياكلوا يبقى لازم كلمتين قباحة على السريع.
ولما الستات تمشي في الشوارع لا هي لابسة ولا هي عريانة، ده حكم واجب كلام قبيح.
ولما شاب يمشي يعاكس ويتحرش بالبنات، ده لازم له كلام قبيح اللي فيه سيرة الأم.
ولما الناس ما تلاقيش تاكل ولا تلبس ولا تتغطى ولا تعيش، يبقي إيه.. هه.. إيه... كلمة قبيحه صح؟
علشان كل ده وغيره وغيره وغيره وعلشان ما تكتمش في نفسك وتحصلك حاجة وكده كده الدولة مش هتعالجك وتسيبك تموت فلازم تريح دماغها ودماغك وتسيبك تقول اللي في نفسك وما تتكتمش لازم يكون في مادة في الدستور تسمحلنا نقول كلام قبيح.. يعني لا كلام ولا فعل؟