هكتب لحضراتكم كما تعودت وتعودتم.. بالعامية المصرية المعروفة متعاصة بالفصحى السهلة المألوفة.. ومن خلال العنوان اللى فوق «موضوع».. حخش دوغرى فى الموضوع.. سياسة مصدر ساس يسوس.. يسوس وليس ياسوس.. واسم الفاعل للسياسة سائس.. ساس سائس.. وسائس غير سائس اللى هيا بالعامية سايس.. والثانى اللى هو السايس عمله معروف ومألوف ومكشوف فهو على الأقل يساعدك فى ركن العربية ثم يساعدك فى الخروج من الركنة، وفى معظم الأحوال لا تجد هذا السايس إلا وأنت خارج من المكان اللى طلعت عينك عشان تلاقيه وطلعت عينك عشان تركن فيه وطلعت عين اللى خلّفوك عشان تطلع منه بدون خسائر.. ثم تنشق الأرض فجأة ليخرج منها هذا السائس أقصد السايس وفى يده فوطة زفرة معفنة يلخمط بيها إزاز العربية وهو يردد بلهجة شحاتية مصحوبة بنبرة تهديدية.. كل سنة وانت طيب يا سعادة البيه.. فتسأل نفسك هوه النهارده عيد إيه؟!.. ثم تضطر عشان تخلص منه.. تظرفه على الأقل ورقة بخمسة جنيه.. يبص فيها «بقرف» وفى ثانية.. يتركك ليلحق بعربية تانية.. هذا كان الثانى.. أما الأولانى.. ركّزوا معايا عشان ماتّهوووش.. الأولانى اللى هو السايس من السياسة.. ففى معظم الحالات عمله غير معروف وغير مكشوف إنما مألوف.. والاتنين وشّهم مش وش كسوف.. هههههههههه.. ومن خلال الباحث النتى الشهير وجدت الآتى.. ساس الناس أى حكمهم وقادهم وأدار أمورهم.. وساس الأمور أى دبّرها وأدارها أو قام بإصلاحها وتقويمها وممكن هدمها وردمها وإعدامها وتسييح دمها.. والسياسة تحتمل كل المعانى الآتية «النظام.. المنهج.. السلوك.. الأسلوب.. الطريقة.. إلخ إلخ إلخ».. وتحتمل أيضاً «الطاخ طيخ طخ».. وتحتمل أيضاً «دور ولف.. وانصب فخ».. وتحتمل أيضاً يا أعزاء «الكدب سيد الأخلاء والغدر قمة الوفاء» ولأننى ضد فكرة التعميم.. وفى الحالتين السابقتين.. السائس والسايس.. ماينفعش نقول كلهم.. والأصح نقول بعضهم.. وعشان نركز أكتر.. قلنا فى البداية أن السياسة مصدر ساس يسوس واسم الفاعل هو سائس واسم المفعول هو مسوس.. حلوة قوى مسوس دى.. يعنى.. مثلاً يعنى.. الحاكم هو السائس والمحكوم هو المسوس.. لأن الحاكم هو الفاعل والمحكوم هو المفعول.. المفعول بيه.. والمفعول فيه.. المهم إنه يفضل على طول مفعول.. (ومنين أجيب ناس تقول بعد ما تفهم وتفهم قبل ما تقول).. ما علينا.. المهم.. هذا ما كان عن السياسة وننتقل الآن إلى «القرف» بفتح القاف والراء وتسكين الفاء.. وجدت فى الباحث النتى الشهير أن القرف يعنى الأديم الأحمر.. حد حيغلس ويقول لى يعنى إيه أديم أحمر.. حقول له ماعرفش وكسّلت أبحث عنها.. إبحث انت بقى.. ويقال أحمر قرف يعنى شديد الحمرة.. متهيألى دى واضحة ومفهومة.. والقرف هو مخالطة ما يستكره.. يعنى بالبلدى مخالطة الحاجة اللى بتكرهها بالاضطرار.. والقرف هو العدوى والوباء.. والقرف داء بس ليه دواء.. ومن الآخر كده.. المعنى الدارج والسهل والواضح للقرف هو «القرف».. تخيلوا كل الرغى اللى فات ده كان.. لتوضيح معنى العنوان.. أنا لو منكم أقص المساحة دى من الجورنان.. بس قبل ما تقصوها.. وتولعوا فيها وتحرقوها.. ياريت تراجعوها.. يمكن تلاقوا فيها.. اللى يخليكوا تحتفظوا بيها. ■ ■ «بعيداً عن السياسة وقرفها.. لواحده نفسى أعرفها» صوتِك جميل.. دمك عسل ياعين ياليل.. عَ اللى حصل أول ما طيف.. طيفك وصل الغُمة راحت واختفت واليأس ناره.. انطفت وأملى اللى.. كان هِلك قام جرى راح يستقبلك والعقل مِ الفرحة.. فصل قلبى.. زغرطت.. همومُه وجاله بُكرة.. وقال ليُومه قوم وسيبنى معاها.. حبة أتهنّى.. حنية ومحبة قوم بقى.. وبطّل كسل ياوش.. سبحان مين خلق تبص له.. يرووووح القلق وتدوب فى سحره وتنعزِل عن أى شىء.. دمه رِزل زى الإحباط.. زى الفشل صوتك جميل.. دمك عسل ياعين ياليل.. عاللى حصل أول ما طيف.. طيفك وصل ويبقى السؤال.. اللى كان المفروض يكون فى بداية المقال.. ده لو كان اللى بكتبه ده ممكن نسميه «مقال».. والسؤال على أى حال.. هل هناك علاقة تربط بين السياسة والقرف؟!.. والإجابة اللى عندى.. اللى عندى أنا.. نعم هناك علاقة.. والدليل.. وده طبعاً على سبيل المثال.. مش إحنا ساعات لما نقرأ للساسة (لبعض الساسة) فى الجرايد أو المجلات.. أو فى صفحات التواصل الاجتماعى.. أو نسمعهم فى الراديو.. أو نسمعهم ونشوفهم فى برامج المكلمة التليفزيونية.. مش ساعات بنقول.. انتوا بتقولوا إيه؟!.. إسكتوا بقى جتكوا «القرف».. إذن هناك علاقة وطيدة بين السياسة والقرف.. والله أعلم. وقبل ما أمشى.. أبوس إيديكم.. إوعوا أى حد فيكم.. بعد ما أدّيله ضهرى يقول.. غوووووور بقى جتك «القرف».. ياريت تقول ولو من باب المجاملة والمجاملة كياسة والكياسة سياسة «كلامك جميل ودمك عسل.. ياعين يا ليل عَ اللى حصل.. أول ما مقالك وصل.. وغور بقى جتك آل هه ههه هههههههههه».. وإلى أن نلتقى مرة أخرى.. «ده لو كان فيه مرة أخرى».. تحياتى وأطيب أمانى قلبى والسلام عليكم ورحمة الله وبركاته.
