1- مُحرَّم
ما تتقاتلوش على قلبي ياللي
ياما قطَّعتوا في وريدي
ما تستنوش شمسي وضلي
عمري يوم ما همّد إيدي
الحرب بيننا اليوم حرام
سيبوا كعبة روحي طاهرة مُقدَسة
سيبوا نور القلب يطلع
وهسيب قلوبكوا مُدَنسة
سيبوا كعبة روحي طاهرة مُقدَسة
2- صَفَر
صِفر المتاع والامتناع والراحة بعد الطبطبة
صِفر العتاد والاعتياد والعُمر ضاع ع المصطبة
صِفر الأمان والامتهان اصبح غريزة مُرَتبة
صِفر الغرام والانتقام بنفس الطريقة المُرعِبة
صِفر الوطن وصِفر حضنِك لما بحتاج الدفا
صِفر الوفا
صِفر والصِفر الحقيقة المؤسِفة
3- ربيع أول
وبوادر الحل المثالي في ريحة الجو انتعاش
داوى الجروح.. والكل عاش
وانت اللي جرحَك عُمقه ميل
ميكفيهوش بيتادين وشاش
وانتٙ اللي سايب روحٙك من أول الرحلة لآخرها
ومفّصَّل العمر بمقاس مترين قُماش
4- ربيع آخر
واهو فات ربيع بعديه ربيع
بعديه الجميع من غير خلل
والعشق إحساس مُحتمل
بس انت مش قادر تآمن للزمن
فبترتجل خوفك ملل
وترجع تقول إيه العمل؟
والعمل كان رهن إيدك بس ضاع!
يا مكمل الأحلام صراع
فات من صراعٙك أد إيه؟!
5- جماد أول
جٙمِّد مشاعرك جوه فاترينة العرض السخيف
الشعر زيف وقوالته كيف ياللي إنت كيف الميه ف أزايز البيبسي القديمة
ياللي انت رافض القسمة الأليمة
على شطر أشعارك / عناد
جماد رحل سابك جماد!!
6- جماد آخر
جماد رحل جالك جماد
قانون وداير ف البلاد
ومفيش رحيل ملهوش معاد
بس كله ف دفاتر الغيب والودع
فخليك جدع وواجه الغيب بابتسامة المحارب
حتى لو لم تنتصر!!
7- رجب
أساطير الدنيا اللوَّاعة
أسْرت بالروح 2000 ساعة
ورجعنا انا وانتي بنتسلبَط
ونعلَّق روحنا ف شمّاعة
بلاستيك بس تبان عاجي
فادعيلي أكمل معراجي
اللي هموت بعديه
واسكنى شُريان قلبي التاجي
جايز تحييه!
8- شعبان
مش قلبي القِبلة اللي تصلّي
وقلبك وجوارحك بصَّالها
ولا عمر عيونك راح تفهم - إيه المأساة ؟ -
فاتركي تجاعيد روحي ف حالها
واهربي من خوفي ومن قلقي
من غير مُواساة!
9- رمضان
ف آدان الفجر أنا راح أصومِك
وهصوّم قلبي انا عن عشقِك
ولا هعشق ريحتك ف هدومك
ولا هشرب ريقك ولا عرقِك
وهقاوم من أول ما اصحى
ولحد ما انام هفضل أقاوم
وهداوم ف البعد أنا عنكِ
ولحد ما اموت هفضل اداوم
مش يمكن بعد الموت جنة
ويدخلها القلب عشان صايم!!
10- شوَّال
العيد..
العيد مش عيد..
طول منتي بعيد
ولا حتى اللُقا والمواعيد
بقا ليهم طعم ولا ملامح!
عِربيد الليل السكران
مش ناوي يقضّي الليل سارح
ولا ناوي يقضّي اليوم فايق
30 سنة عايش غرقان
ولا حرَّك طابية ولا بيادق
وفي الآخر مات/ كشّ وزير
ودي حاجة ملهاش تفسير!
11- ذو القِعدة
والقَعدة معاه مبقتش تلذّ
تراجيدي الحكايات والصورة
ولا تسكر ويَّاه ولا تمزّ
ولغوشة الصورة اللي ف عينه
مهزوزة ولسه هتتهز!
12- ذو الحِجة
بحلم بالحج بقالي كتير
بتخيّل إن البيت كعبة
وبطوف حواليها 200 مرة
لحد ما تتعب أقدامي
بعدها بقعد اريَّح حبة
ف محراب المَدخل وأصلّي
ولا طولت الدنيا ولا الجنة
ولا فاهم إيه اللي حصل لّي الغربة بتنكش جوايا
سرداب بيوصل للشقَّة
فادخل جوّاه بكل جوارحي
ولا احس براحة ولا مشقَّة
وعلى أول كنبة بغوص ف النوم
واحلم إن أنا واحد تاني
اصفى كتير من أسئلتي
وأطيَب وأحنّ
لا بحلّل غربتي ولا توهتى
ولا حاسس إن انا هتجنّ
-ده فرضا م الأصل أن أنا عاقِل!-
أنا عارف إنك زهقانة
وأنا آسف شاغلك بمسائل
توحيلك بالخوف والترويع
بيقولوا مُحرَّم هيهِل!
ومعاكي أنا بحسُه ربيع؟!