سجال الحب

السيدابوطاحون & صباح ابوالنور
س
صباح نادي
ومش عادي
صباح ياسمين
وكله حنين
بيملى القلب حنيه
وحاء باء
ولسه حمامتي
ف الغيه
بتكتب لي
كلام في العشق
دوبني
انا المشتاق
ص
صباح الفل والياسمين
علي شاعر مدوبني
غير قلبه احن لمين
و بالاحضان واخدني
س
صباح أفراح يا صبوحه
و جايبه بين رموشها النور
و شايفه ف قلبي صورتها
بتغني ف هنا وسرور
ص
شاعر معاه قلبي
بالهنا ينام يصحي
شربت وياه حبي
بحبه عامي وفصحي
س
حمامه ساكنه في قلبي
عشقانه الملاغيه
ويصحي الصبح في دربي
يلا قيني انا وهيه
ص
قلب جميل بيهواني
بدوب انا في ضي غرامه
عيونه والله سحراني
قلبي بيرقص علي انغامه
س
يا احلي نبضه ف الدنيا
يا ساكنه القلب في ثاتيه
وخدتي قلبي على إيدك
رقص من ايد للتانيه
ص
ياأحلي حلم في عمري
اتمنيت تكون معايا
بأمر الحب مش أمري
يافرحتي وكل هنايا
س
اناديلك يا نور عييني
في نن عنيكي تخديني
وساعة البرد ما يشتد
برمش العين تدفيني
ص
من حبي عليك بداري
كل اللي اسيته في بعدك
بحبك مش عارفة إداري
مشاعري كلها جت عندك
س
وآه يا حب خلاني
غريب في وسط خلاني
معاهم بس بجسمي
وقلبي ع البر التاني
ص
ياتعبني ومدوبني ف هواك
خايفة يوم تنسي وتسيبني
انا عمري اعيشه جواك
ويجيني قلبك يعاتبني
س
تخافي ازاي وانت ف قلبي
اللى بيرقص لما يشوفك
باشاره منك بيلبي
منين بقه ييجي خوفك
ص
وانت معايا مبخافش
وقلبك روحي وهنايا
مكان بدونك ماروحش
عايزاك تملي معايا
س
أنت عيونك حكايه
سحرتني من اول همسه
شدتني من البدايه
وعرفت من اول لمسه
ص
شدوني عيوك وخدوني
لدنيا كلها الحان
و جوه قلبك ودوني
مليت حياتي حنان
ص
ياللي روحي بتناديلك
عاشقة قلبك وحبك
تندهلي اجري واجيلك
وتحلي حياتي بقربك
س
بتغني معاكي العصافير
وعيونك بتقول مواويل
حبك خلاني اطير
وأرجع على صوتك واميل
ص
في حبك عايشه وطايرة
وغرامك غير حياتي
من غيرك دايما حايرة
بنسي ف قربك اهاتي
س
حاسس انى معاكي ف جنه
عايز المس نبضة قلبك
من عطر هو اكي بتهني
خايف م الحساد على حبك
ص
انت الحب اللي اتمنيته
وحبيب قلبي وهنا أيامي
وسنين عمري واستنيته
دايما شيفاك في أحلامي
س
خليتي الأيام لها معني
وحبك باين مفعوله
آه لو كل الناس تسمعنا
ويشوفو الحب على اصوله
ص
بحس معاك بشعور غريب
وبشوف الطيبه ف قلبك
وانت من قلبي قريب
ومفيش في حياتي قبلك
ص
حبيتك بكل لغات الدنيا
واتمنيت أعيش ف غرامك
ده حبي ليك حاجه تانيه
نفسي أسعد كل ايامك
س
انت حياتي اللى اتمنتها
وأنت الحلم اللي آنا رسمته
بعد الصبر ف أيدي لقيتها
و رقص قلبي و ودع صمته
ص
حبيتك فوق ماتتصور
وحلمت معاك بالجنة
حسنك سبحان من صور
و ف حضن غرامنا بنتهني
س
آه يا حبيبتي ونن عيوني
يا ما شفتك ف الحلم زمان
بتجري معايا ف بستاني
وتكلمي فرع الرمان
ص
انت حبي الاولاني
قلبك حنيه وامان
ماانساك ولا حتى ثواني
و غرامنا احلى الالحان
س
دلوقتي قدامي حقيقه
اجمل من كل الأحلام
تتمني رضايا ورقيقه
و تجمل كل الايام
ص
اه ياحبيبي ياكل حياتي
عشت معاك كل الهنا
وحبك هو الفرح الاتي
عاشقاك انا ودايبه انا
*************
#سجال_الحب
#السيدابوطاحون & #صباح_ابوالنور