جربت أكتب ع الصحاب
ببص جنبي مالقتش حد
منهم اتغير وساب
والباقي دور ع العدد
أيام تعدي ورا السنين
وكل واحد راح بلد
والبُعد ياخدني لحنين
والله أصله كان سند
تهون عليا عشرته!
دا في محنته عليا اتسند
وأهي ذكريات وكان وكان
وأنا ياما قولت لك زمان
اوعاك يغرك العدد
فمسمعتش كلامي ليه؟
ومتوتر كما الدنيا
في عز الرعد ويا البرق
ملعونه سنين البعد
بتغير نفوس الخلق
وبتهدم بدون أسباب جبال الود
وبتقطع وعود كانت ماهيش تتعد
وهو البعد واخدنا ورايح فين؟
وهو العيب دا كان على مين؟
أنا الخاسر سنين البعد
أنا واقف وهم ماشيين
يا كون مليان بعاد وفراق
يا عَمر بيجري وقصير
سبحان مقسم الأرزاق
مقدر مش بيتغير
فاخترت ليه توعد
وبإيدك الموضوع
وحدك بقيت تبعد
وحدك بقيت موجوع
تحت القمر غنيت
يا خلق قولت ياريت
ما شبعت بعد الجوع
وحدك بقيت موجوع
ماله البَعاد ع الناس؟
ما البعد ليه سببه
قرب كمان تنداس
ويقولوا مين جبره
في عتابي تتمسكن
هيفيد بإيه اللوم
يبقي البعاد أحسن
والقرب ماله لزوم