هامش..
الفجر أذّن فيا ما سمعتوش
سلّكت ودنى بعشم وجبرتها تركّز
ما أنا كنت بتأزأز م الفِكر على غفلة
والدنيا بتشيلنى وتهبدّنى 100 مرة
كروان بيتسلى فوق السطوح بيا
ويسلّم الملكوت للمالك الأصلى
هب الهوا فيا وقال لى اوصف لى
إيه آخر الأخبار والدنيا ماشية إزاى
عقلى البعيد نساى
كل أما يتوجّع ينسى اللى يحصله
وياخد له ركن بعيد
يبكى له كام ليله ويعود بريء جدا
شديت حزامى بذوق
ودعيت بكل خشوع إنى اكتمل إنسان
وإن الآدان يكمل
********************
المشهد الأول..
الشمس طالعة وجاية تتمختر
وتمد نورها ف عينى تلاعبنى
كان إيه اللى خلى الحزن يغلبنى
ويشق روحى ف اتقلب ماضى
كان إيه اللى خلى دايرة الملاعين
تتلف فيا وتبتسم لى ف أموت
أو أعيش بدون ما أتمنى إنى أعيش
كان إيه اللى خلى شجرة الجميز
مكروهة جدا جوه حلق الناس
مع إن أصلا كان أبوها التين
ماشيين ف دايرة يحتويها الطين
كل أما بدخل فيها بتّلوث
والناس تنفّض ضهرى بسذاجة
وتقول لى كمّل إنت أهو كويس!
بيجمّلونى بزيف وبيهربوا مني
بهرب بخوف منى واتدارى ف جيوبهم
بطلع ونيس زايد بخرج مع الفكّة
كان نفسى اتكى على حبى ف قلوبهم
والبد بدون ما أتوجع أو ينزفونى بعنف
********************
فاصل..
فى سحابة واقفة جنبى طول الليل
عمالة تبكى بعشم وتقولى معذورة
مكنتش تقصد ف الفراق تتكسر
أو حتى ينزل من عينيها دموع
فى سحاب بيبكى بس مش مسموع
********************
المشهد التاني..
الدنيا ملعب وإنت كورة شراب
الناس تشوطك تتقسم نصين
باقى القصيدة راح يودى لفين
ولفين هتهرب من قدر محتوم
كل أما تكبر تتملى ف هموم
كل أما تكبر تتلبس ف هدوم
ويقلعوك منهم أو يقسموك نصين
أنا وإنت جايز نتقلب شطين
والناس تعدى علينا وتدوسنا
أو ياكلوا ترمس ويقلبوه فينا
أنا وإنت دنيا وتايهة خطاوينا
الشمس طلت فينا نورنا
مدت شعاعها بشوق
سيحنا وعورنا
فبدأنا نَزّ ظروف وبشر بتوجعنا
عاوز الحق اخلع نفسى من روحهم
وأنا بجرى تايه منى جواهم
كل أما برفع رجلى بتّثبت
وأعود لنفس الوقفة فى قفاهم!
هامش تملى ماليش مكان فيهم
بيدخلونى عشان بعرف أدفيهم
وأنا العليل برتجف م الوحدة طول الليل
********************
المشهد الأخير..
سلّمت قرص الشمس جسمى ولا اتهزيت
وسلّمت ودنى للأدان بالوقت
الشمس حامية وكتفى تلج يسيح
والناس بتنزل منه لا إرادى
وأنا بجرى مُجهد حبه م الأيام
والوقت ماسك فيا ورابطنى
معرفش فعل اليأس ده عادى
والا كلام الناس بيحبطنى؟!
ماشى وبيمد إيديا على بكرة وبقوله خف
بلاش تجيلى كئيب
وإن مرة شوفت ظروفى قلبت ديب
خليك حنين وشدنى منها
مش كل مرة تسيبها تنهشنى
تنزل دموعى تسّكرك فتموت!
وتجيلى ليل غامق بيطَّوَّح
مش هابقى دايما بحضنك مبسوط
كل الظواهر فتنت عليك للناس
وقالوا طيب وقلبه سهل يميل
الوقت ده كان وقت للتطبيل
علشان يعدوا ويشربوك بهدوء
عملوك إزازه بقلب سهل الفتح
كل اللى يعطش يشربك مصلحة
ويلم روحه ويجرى بيها بعيد
وإنت الوحيد الباقى ف المشرحة
هتعيش تملى ف دنيتك عربيد
كل المشاهد دايرة بتلفّك
وتلف فيها وتنتهى جواك
الناس مصالح.. وقت
عِد اللى لسه معاك