أغنية «راب» تنتقد أداء الرئيس: مصر كبيرة عليك

الأغانى لون جديد من أشكال الرقابة السياسية.. وأحد أصوات المعارضة فى زى فنى متعدد الأنواع، «راب الإخوان المتأسلمين» أغنية شبابية حديثة بصوت نسائى.. تعارض الرئيس محمد مرسى وجماعة الإخوان على موقع التواصل الاجتماعى «يوتيوب»، بكلمات غنائية على موسيقى ولحن فن الراب.. صوت «قمر» و«مى» ترددان عبارات ناقدة لسياسات الرئيس تليها جمل تحذيرية من غضبة الشعب والخروج عليه كما حدث مع الرئيس السابق مبارك.
«أنا مش هخاف منك يا مرسى إنت وأبوإسماعيل.. عشان إيه هيحصل فيّا أكتر من اللى حصل فى الجندى.. أنا مهما عملت فيّا برضه مش هخالف ضميرى.. طالما الموت حق علينا وكلنا هنموت» مطلع الأغنية الشعبية ذات اللهجة الثورية.. على الكليب صورة ثابتة تظهر فيها قمر ومى ملثمتين ب«شال» فلسطينى، يومان فقط مرا على تحميل الأغنية على الموقع، حظيت خلالهما على مئات المشاهدات.
«رامى» مغنى راب، يصف الأغنية بالفضفضة السياسية بشكل فنى، موضحاً أن «الراب» أسلوب غناء له جمهوره وطريقته فى تقديم المعارضة «إحنا بننزل الميادين ونعتمد فى كلمات الأغانى على الواقع اللى بنشوفه.. ومعظم مغنيين الراب من الثوار»، يؤكد الشاب العشرينى أن كلمات الراب بسيطة ومنتشرة بين كل الشعوب الثورية، مؤكدا رفضهم لسياسات الإخوان.
«راب الإخوان» تنتقد تحيز مرسى لأعضاء جماعته وتطالب بالرحيل: «إنت أهلك وعشيرتك دلوقتى بيتباهوا بيك.. بس بكره هيبقوا عليك وهينفضوا من حواليك لما الشعب هيثور عليك.. ارحل يا مرسى مصر كبيرة عليك».. وتصف مى وقمر مشروع النهضة الإخوانى بأنه حوادث قتل الأبرياء فى أسيوط والبدرشين، الأغنية المفصلة لسمات شخصية وتصرفات مرسى تتناول العودة فى الكلام «عمال تاخد قرارات والشعب يقولك ارحل.. وتانى يوم ترجع فيها وتقول كلنا بنغلط.. انتوا طبختوا الدستور بس هييجى عليكو الدور وينقلب عليكم حزب النور».