بالصور| الغلاء يضرب أدوات الكليات العلمية.. والطلاب: الأسعار زادت للضعف

على بعد أمتار قليلة من مستشفى دار الحكمة بشارع القصر العيني، حيث المكان الأشهر لبيع كافة الأدوات العلمية والمواد التي يحتاجها طلبة الكليات العلمية كالطب والصيدلة والعلوم، سادت حالة من الاستياء والغضب الشديد بين طلاب تلك الكليات يشكون ارتفاع أسعار الأدوات الخاصة بهم هذا العام.
ومن أمام أحد المحلات المختصة ببيع الأدوات العلمية والطبية يدور حوار بين 3 فتيات من طلبة كلية التمريض يشكون ارتفاع أسعار الأدوات بشكل كبير، وتقول أية أحمد الطالبة في السنة الأخيرة بكلية التمريض :"كل حاجة زادت أوي السنة دي حتى البياعين بيرفضوا يفاصلوا وينزلوا السعر ومش عارفين نعمل ايه؟".
واستكملت الفتاة العشرينية حديثها ل"الوطن" قائلة :"أنا نزلت أشتري أنا وصحابي واتفاجئنا إن كل الأسعار زادت أوي حتى بالطو التمريض اللي كان من كام شهر ب80 جنيه دلوقتي بقى ب100 جنيه وفي أنواع ب150 جنيه كمان".
وتشكو جهاد الصواف، طالبة بكلية طب أسنان القصر العيني ارتفاع أسعار الأدوات الخاصة بهم قائلة :"أسعار الخامات اللي بنحتاجها في طب أسنان زادت بنسبة الضعف والحاجة اللي من سنتين كنت جيباها ب 600 جنيه السنة دي جيباها ب 1300 جنيه".
وأضافت الصواف قائلة :"احنا كل سنه بنشتري الحاجات اللي خلصت من عندنا وأحيانا في بعض المواد بتخلص في أسبوع واحد و لو بنجيب علبة الجوانتي الطبي ب 40 جنيه بنجيب زيها تاني في خلال أسبوع و نص تقريبا، حتى الأسنان المخلوعة بقت تتباع الواحدة بحوالي 30 جنيه وفي عجينة طبية بنستخدمها في الشرح العملي على الأسنان كانت بتتباع ب150 جنيه وصل سعرها ل300 جنيه يعني اللي نفسه يدخل الكلية و مش قادر على مصاريفها مش هيدخلها".
وتقول منى أحمد، طالبة بكلية العلاج الطبيعي بالقصر العيني :"أسعار الحاجات زادت بنسبه 30 % تقريبا والمشكلة إن الحاجات صيني وبتبوظ بسرعة يعني في جهاز إسمه "الترا ساوند" كان من 6 شهور بيتباع ب 450 جنيه تقريباً النهارده بقى سعره 650 جنيه أقل حاجة ده لو ليكي حبايب في القصر العيني"، حسب تعبيرها.
ويؤكد أصحاب المحلات أن قانون القيمة المضافة الذي أعلنت عنه الحكومة الفترة الأخيرة أدى إلى رفع أسعار الأدوات بشكل كبير يصل في بعض الأحيان إلى 70% مقارنة بالعام الماضي.
وتقول نورا محمد بائعة في أحد محلات بيع الأجهزة والمستلزمات الطبية :"الأسعار زادت بنسبة كبيرة أوي عن السنة اللي فاتت يعني بوكس أدوات صيدلة القاهرة السنة اللي فاتت كان ب35 جنيه السنة دي بنبيعه ب75جنيه"، موضحة أن "البوكس" مكون من عدد من الأدوات من بينها أنابيب ودورق طبي ومخروطي وورق عباد شمس وورق ترشيح وغيرها من الأدوات التي ارتفع سعرها كثيراً فور إعلان الحكومة عن قانون القيمة المضافة.
وأضافت نورا :"البالطو الطبي أقل نوع منه ب45 جنيه والسنة اللي فاتت كان ب35 جنيه، وأجهزة قياس الضغط وصل سعرها ل130 جنيه السنة دي وكانت بتتباع ب90 جنيه السنة اللي فاتت".
وفي نفس السياق تقول إحدى البائعات في محل لبيع الأدوات الطبية :"التجار أول ما سمعوا عن القيمة المضافة زودوا أسعار الحاجات كلها عن السنة اللي فاتت منهم البالطو الطبي وأجهزة الضغط وقياس السكر وكل الحاجات التانية".