بالفيديو.. أسعار نار.. وبائعون: ارتفاع سعر الدولار سبب الأزمة

تشهد الأسواق المصرية ارتفاعا جنونيا فى أسعار الياميش قبل حلول موسم شهر رمضان وذلك بعد ارتفاع سعر الدولار بالتزامن مع الأزمة التى تشهدها سوريا فى الوقت الراهن.
وقال عبده سيد صاحب محل ياميش بحى السيدة زينب: "من قبل شهر رمضان والأسعار غالية ومش عارفين سبب ده إيه، وصعب المقارنة بين السنة إللى فاتت والسنة دى؛ لأن ارتفاع سعر الدولار أثر بشكل سلبى فى الاستيراد وعمل على زيادة سعر الياميش".
وتابع قائلا: "أسعار الياميش السنة إلى فاتت كان البلح بيدأ من 6 جنيهات، إلى 18 جنيها وده حسب جودة البلحة وحجمها ونضافتها أما الأسعار السنة دى البلح بدأ ب10 جنيهات جملة وإحنا مش عارفين كبياعين هنبيع بكام يعنى السنة دى البلح هيبدأ من 12 جنيها وبزيادة".
أما بالنسبة للزبيب قال: "الزبيب السنة دى غالى، كان المصرى السنة إللى فاتت بيتباع ب28 لكن السنة دى جملة فوق ال30 جنيها، والبندق كان بيتباع ب120 جنيها دلوقتى ب110 و120 جملة، عين الجمل كان ب60 السنة دى ب80 أما عن لفة قمر الدين فالمصرى السنة دى أحسن من السورى بكتير وأرخص".
فى السياق قال سيد يحيى العطار صاحب محل ياميش بحى السيدة زينب: "الأسعار كويسة لكن فيه أصناف بس زادت زى المشمشية والقراصية لأن كل المتنجات دى بتكون استيراد من سوريا وتركيا وارتفاع سعر الدولار رفع سعرهم لكن المنتجات المصرية سعرها مناسب".
وتابع: "البلح أنواع فيه الفاخر وده بيكون سعره غالى وبيدأ ب24 جنيها وفيه البلح الشعبى العادى وده بيبدأ سعره من 5 جنيهات".
وأوضح الحاج درويش العربى صاحب محل ياميش بحى السيدة، قوله: "مافيش إلا التين بس هو إللى سعره مرتفع بيكون ب66 جينها، أما البلح بيكون من 8 جنيهات إلى 16 و18 جنيها مش كل البلح، أما الزبيب بيكون من 16 إلى 44 جنيها".