أى تشابه قد يرد إلى الذهن لشخوص أو عبارات هذه المكالمة مع الواقع، ليس أكثر من محض مصادفة، ولا يدل إلا على سوء النية لدى صاحب الافتراض. ألوه! إزى سيادتك يا فندم؟ إنت مين؟ الدكتور محمد مرسى، إزاى مش عارفنى يا فندم؟ بأمارة ما سيادتك كنت مسمينى: البياع السريح. افتكرت. يكون فى معلومك: أنا عارف إزاى هربت من سجن وادى النطرون، ومين اللى هرّبك، ومين اللى إداك الموبايل اللى على القمر الصناعى، وكمان عارف إنك كنت محبوس بتهمة التخابر مع دولة أجنبية. أنا طلبت سيادتك بس علشان أطمئن عليك أولاً. وبعدين أستفيد من خبرة سيادتك الطويلة. الشعب الجبلة ده إزاى يتحكم؟ خبرة مين يابا؟ داحنا اللى بيقولوا علينا عملناه فى 30 سنة: قتل وسحل وتزوير انتخابات وسرقة وتعذيب، عملتوا انتم أكتر منه فى كام شهر. دانتو يا جدع ما عندكوش ريحة الدم، من أول الواد المرشد لغاية الولية المجنونة اللى دايرة تقص فى شعر البنات. أنا سيادتك حاطط ولادى جمال وعلاء فى عينى من جوة. وآدى إحنا شوية شوية بنخرجهم زى الشعرة من العجين. روح خلّى نتنياهو ولاّ أوباما يدوك دروس خصوصية فى الإنجليزى الأول، عشان ما تضحّكش علينا الناس. إن كان على أوباما ولّا نتنياهو، إحنا فى الهوى سوى يا فندم. غور ياد انت ما ترميش بلاك علينا. بكرة يقطعوكو حتت. ألوه! ألوه! قفل السكة فى وشى الكافر الزنديق، حتى إنت مش عايز تكلمنى. لازم نأخون الراجل ده ونظامه البائد كله. ونلبس سوزان النقاب، هى ومراتات ولادها. ملحوظة: الألفاظ الخارجة قمنا بحذفها. *** * شاكيرا، اختارها واحد من هؤلاء الذين احترفوا السب العلنى على الفضائيات المسماة بالدينية، لينهش لحمها على الملأ، أسهب فى وصف جسدها بالتفصيل الممل، بما فى ذلك الثنايا أو التضاريس أو المنحنيات. ولم يفته تشريح الإيحاءات الملعونة التى تتسلق أحبالها الصوتية، كما استرسل فى تفسير التموجات الشيطانية فى نظرة العين أو الرسائل السرية التى تبعث بها سائر المناطق المكهربة. طبعاً أنا سأصدقه إذا قال إنه لم يكن يتطلع إليها لا سمح الله. فقط كان يغتصبها بعينيه. بس كده. *** * أقول لموجات الجراد التى تغير على مصر الآن، لتأتى على الأخضر واليابس: لا شىء هنا يؤكل. الإخوان قاموا بالواجب وزيادة. *** * كزائر الفجر، جاء الحوار الذى أجراه الأخ محمد مرسى فى الثانية إلا دقائق بعد منتصف الليل. البطل الحقيقى لهذا الحوار الممل هو المونتاج الذى أشرف عليه الشاطر. كل الناس، داخل أو خارج الجماعة، يعلمون أن مرسى ما بيسترش.. السؤال الذى كنت أتمنى أن يطرحه عمرو الليثى عليه هو: هل لك أن تذكر لنا بعض الأمثلة على المواقف أو القضايا التى تصرفت فيها من دماغك بعيداً عن أوامر مكتب الإرشاد؟ عموماً ما تفرقش. فأنا على يقين من أن السؤال والإجابة كانا سيخضعان لمقص الشاطر. *** * إيمانى لا يتزعزع بأن كل ظلام العالم أضعف من أن يطفئ شمعة، لكن هذه الشمعة بمفردها أضعف من أن تضىء العالم.