الحكومة تنفى زيادة الأسعار لكن «المواطن» لا يكذب

«الوطن» فى جولة مع المواطنين بالأسواق: الزيت ب17 جنيهاً.. والسكر ب7.. و15 جنيهاً زيادة فى أسعار كل أنواع اللحوم

جولة سريعة بالأسواق ومطالعة لوجوه الباعة الذين بارت بضاعتهم بلا مشترٍ ووجوه مشترين اكتفوا بسؤال عن السعر فكفتهم الإجابة عن متابعة الشراء، حالة ركود عام فى أسواق الخضراوات والفاكهة ومحال السوبر ماركت التى دشنت عروضاً مختلفة على بعض معروضاتها لعلها تستطيع أن تصلح ما أفسده «ارتفاع الأسعار»، فى الوقت الذى تنفى فيه الحكومة أى ارتفاعات رسمية.
مهندس الديكور القادم من 30 عاماً غربة فى الإمارات لم يكن يعلم أن مصر قد تحولت لكل هذا الغلاء الذى سيقارب على ابتلاع «تحويشة العمر» فى كام سنة، المهندس مدحت أحمد لاحظ منذ قدومه إلى المحروسة عدة موجات من الغلاء فى كل القطاعات بدءاً من قطاع العقارات وحتى الزيت والسكر «كيس السكر دلوقتى ب7 جنيهات، زيت القلى ب12 جنيهاً بدل 9 وزيت الذرة ب17 بدل 12».
الخضار والفاكهة تتراوح بين الارتفاع الشديد أحياناً والتراجع أحياناً أخرى، بحسب المهندس مدحت، الذى أكد ل«الوطن» أن أسعار الخضار والفاكهة زادت كلها لكنها زيادات غير ملحوظة، فهى تتراوح بين 25 قرشاً فى الثوم والبصل والخضراوات الورقية وتصل إلى جنيهين فى الطماطم والفاصوليا والبامية والبسلة، فضلاً عن البقوليات.. أكثر ما يرهق ميزانية مهندس الديكور هو فاتورة الكهرباء والمياه والغاز «رغم أننا موسم شتاء ومن غير تكييف لكن فاتورة الكهرباء جاءت لى أول الشهر بقيمة 500 جنيه مش عارف ليه؟ وعلى فكرة أنا مدفعتش وعملت تظلم فقط عشان أعرف سبب المبلغ ده إيه، أما فواتير المياه والغاز فقد تضاعفت منذ نوفمبر الماضى».
إيمان محمد، موظفة ببنك التنمية والائتمان الزراعى، أكدت أن السلع الغذائية زادت بنسبة 50% تقريباً، وأن معدل الزيادة فى فاتورتها الشهرية لمستلزماتها المعتادة زاد بمعدل النصف تقريباً، خاصة فى بند «الزيت والسكر والأرز»، موضحة: «كيلو الرز المغلف ب7 جنيهات وزيت الذرة اللتر ب17 جنيهاً واللحمة المستوردة زادت من 35 إلى 40 جنيهاً والسمك البلطى بدل 10 جنيهات بقى 15».. شكوتها من ارتفاع المواد الغذائية زادت حدتها عندما ذكرت أسعار الكهرباء «يعنى إيه يقولوا مفيش زيادة وإحنا بندفع أضعاف اللى كنا بندفعه، أنا كنت بدفع 55 جنيهاً إزاى دلوقتى أدفع 180 جنيهاً، ورغم كده يقولوا ما فيش زيادة».
حياة النفوس محمد، موظفة، تعتبر أن الزيادة فى الأسعار أمر طبيعى فى فترة الأعياد «طبيعى أن التجار يكونوا جشعين ويغلوا شوية فى فترات الأعياد لكن الحكومة تغلى الكهربا والميه والغاز ده بقى اللى مش طبيعى».. جشع الحكومة لا يضاهى جشع التجار لدى السيدة حياة النفوس «الحكومة المفروض تحس بالناس اللى حالهم واقف، الناس تعبت أوى ومش لاقية».
أحد محال السوبر ماركت الكبيرة وضع لافتة ضخمة تشير إلى عروض أسعار وتخفيضات على بعض السلع وقف أمامها مشرف الأمن بالمكان «على حسن» لكى يراقب الداخل والخارج ولكن وقوفه الطويل لم يثمر عن شىء «إحنا عملنا عروض الأسعار عشان نحفز الناس إنها تشترى ومع ذلك للأسف ما فيش فايدة الناس معهاش فلوس أصلاً والغريب إننا لسه فى أول الشهر»، أول الشهر لدى سلسلة السوبر ماركت الشهيرة كان يعنى حالة من الرواج للمعروضات من السلع الغذائية ولكن الريح لم تأت بما يشتهون هذه المرة «الناس اللى كانت بتيجى تشترى 5 أو 6 كيلو لحمة بقت بتكتفى ب3 واللى كانوا بياخدوا تموين شهر بقوا يكتفوا بخزين أسبوعى ووشوش الناس بقت تحزن وهما بيبصوا على الحاجة ومش قادرين يشتروها».
نزلت نيفين جورج تشترى بقية مشترواتها قبل أيام من العيد فوجئت بأن أسعار اللحوم قد زادت بهذا الشكل فى فترة الصيام، قالت ل«الوطن»: «ابتدينا صيام وكانت اللحمة ب35 جنيهاً وخلصنا صيام ونزلت اشتريها بعد ما نفطر ب45 طب ليه؟ وحتى الزيت اللى بنطبخ بيه طول فترة الصيام غلى مرتين اشتريته مرة ب16 ومرة ب18 بعد ما كنت بشتريه ب14 جنيهاً قبل الصيام»، ارتفاع فاتورة الكهرباء أفسد فرحة العيد على نيفين وأولادها «اضطريت إنى أخف ميزانية العيد عشان فاتورة الكهربا 200 جنيه على نفس معدلات استهلاكنا اللى كنا بندفع عليها 50 جنيهاً».