6أبريل تدشن حملة أعرف دستورك

دشنت حركة 6 أبريل في إطار حملة اكتب دستورك قامت مجموعه الجيزة بعمل استقصاء حول آراء المواطنين ورؤيتهم لدستور مصر القادم حيث قامت مجموعات ميدانية من شباب الحركة بالتجول بشوارع الجيزة والتحاور مع المواطنين واستطلاع آرائهم.
وعلى صعيد آخر قامت اللجنة الإعلامية بمجموعة وسط البلد بتصميم منشور بسيط عن الدستور ومعناه والهدف منه وقامت المجموعة بتوزيع المنشور لتوعية المواطنين بأهميه دستور مصر القادم .
وجاء نص المنشور كالآتي يعني إيه دستور ؟ الدستور ده عقد اجتماعي زي عقد الشقة بتاعك بالظبط بس بينك وبين الحكومة والدستور ده بيوضح : إيه اللي ليك وإيه اللي عليك، وبيديك حقوقك بصرف النظر عن لونك أو دينك أو جنسك أو عرقك أو وضعك الإجتماعي أو مهنتك... إلخ. والدستور ده بيتكلم على ايه ؟ عن حاجات كتير قوي منها ،،،، “المدنية" وهي الدولة اللي تحافظ عليك و تحميك من غير ما تبص على دينك أو لونك أو فكرك أو عرقك أو وضعك الاجتماعي. “المواطنه" يعني كلنا واحد لينا نفس الحقوق وعلينا نفس الواجبات ومفيش حد أحسن من حد. “سيادة القانون" القانون بس هو اللي يفصل بيني و بينك لو فيه أي مشكلة يعني مفيش شيخ عرب أو كبير عيلة والقانون بيتطبق على الجميع الكبير والصغير “الديمقراطية وتداول السلطة" إنت اللي بتختار مرشحك اللي بيمثلك وانت اللي بتراقبه، يعني محدش ياخد البلد لنفسه عشان كبير عيلة أو معاه فلوس أو نفوذ. أمال القانون ده إيه ؟؟ ده القواعد اللي بتتعمل بعد الدستور عشان تنظم سلوك الإنسان جوه المجتمع واللي يغلط يتعاقب بالقانون. ومين اللي بينفذ القانون ده ؟ 3 سلطات التشريعيه: ودى بتصدر القوانين و تراقب الحكومة، التنفيذية: ودى بتنفذ القوانين وتحط سياسات الدولة و الميزانية، القضائية: و دي بتفصل في المشاكل بين الناس وبعضها و بين الناس والحكومة وساعات بتفصل في صحة القوانين. طيب خلاص كده ؟ لا لسه: الدستور بيديك حقوق كتير تانية زي: الدولة لازم توفر لك العلاج لو انت مش قادر، الدولة لازم تديك مرتب كويس تقدر تعيش به عيشة كويسة (يعني متبقاش انت بتاخد 150 جنيه وغيرك بياخد ملايين)، الدولة لازم توفر تعليم جيد يخرج منه الطالب بعلم مش بمجرد شهادة ورق، الدولة لازم توفر لك سكن كويس بسعر معقول، الدولة لازم توفر لك الأكل والشرب بسعر معقول برضه. و إيه كمان ؟ حرية الإعتقاد: قال تعالى “من شاء فليؤمن و من شاء فليكفر". حرية المراسلات: مش من حق حد يتصنت عليك أو يراقبك عشان إنت مثلاً بتصلي الفجر أو بتنزل مظاهرة. حرية المسكن: مش من حق حد يقتحم حرمة البيوت ويهاجمك في بيتك وسط أسرتك. حرية الرأي: تقول إللي إنت عايزه طالما مخرجتش عن حدود الأدب والأخلاق. حرية التنقل: تروح أي مكان من غير ما حد يقول لك رايح فين وليه. حق الامن: تمشي في الشارع و إنت مش خايف ياه ده الدستور ده حاجه كبيرة ومهمة أوي عشان كده لازم كلنا نهتم به زي ما بنهتم بالأكل والشرب والأمن لإنه هو إللى بيدينا كل الحقوق دى ويحافظ عليها