محمد سعيد: ضابط أمن الدولة كان يعذبني ولا يستجوبني.. والداخلية لا تفرق بين مؤيد ومعارض سعيد: أجبرونا على خلع ملابسنا في نقطة الشرطة وضربونا في قسم عابدين وصعقونا بالكهرباء في أمن الدولة نشرت صفحتا "الحرية للجدعان" و"جبهة طريق الثورة" على موقع "فيسبوك" شهادة لشاب يدعى "محمد سعيد"، كان من ضمن المعتقلين في أحداث ميدان طلعت حرب، التي أكد فيها تعرضه للضرب والصعق بالكهرباء في مناطق حساسة من جسده. وقال "سعيد" في شهادته إنه في البداية تم اقتيادهم لنقطة الشرطة القريبة من ميدان طلعت حرب، وإجبارهم على خلع ملابسهم وعصب أعينهم بملابسهم الداخلية بعد ضربهم، ثم تم نقلهم إلى قسم شرطة "عابدين" بعد تقييدهم أيديهم من الخلف، حيث تعرضوا للضرب والسباب، على حد قوله. وأضاف أنه تم التحقيق معهم من قبل ضابط أمن دولة، موضحا أن ضابط أمن الدولة كان يسأله السؤال وقبل أن يجيبه كان يضربه على وجهه ورأسه، مشيرا إلى أن الضابط طلب منه حسابه على أحد مواقع التواصل الاجتماعي، وعندما قال له أنه لا يمتلك حساب، نادى على أحد المخبرين ويدعى "فراج"، والذي قام بكهربته في أعضاءه التناسلية وضربه.. وإلى نص الشهادة: انا هاقول شهادتى على حسب مافتكر فى اللى حصللنا وانا مش خايف وعمر السجن ما هايكسر عينينا ولا هايخلينا نخاف انا محمد سعيد كنت ممسوك فى أحداث طلعت حرب اللى حصل معانا اننا بعد مادخلنا النقطة ... دخلونا أودة زى مكتب كدا وباللفظ قالولنا (أقلع يابن ******* انتا وهوة الهدوم كلها ) أحنا كلنا قلعنا من فوق بعد ضرب طبعا ....بعد كدا قالولنا كل واحد يجيب الفانلة الداخلية بتاعته غموا كل واحد فينا بالفانلة الداخلية بتاعته وشدوها جامد على عنينا ومناخيرنا وانا مناخيرى أتعورت من شدة الربطة أتكلمت ضربنى كلنا طبعا أتغمينا وأتقفزنا بقفيز بتاع العربيات متكلبشين خلفى والقفيز كان كل مانشده يضيق أكتر وعورنا فى ايدينا وحبس الدم فى شرايينا بعد كدا خدونا ورمونا فى عربية زى الكلاب وأحنا مش عارفين أحنا رايحين فين ودونا قسم عابدين وهناك رمونا فى أودة كدا ضربونا وشتمونا بعد كدا جه وقت (أمن الدولة ) هاتكلم عن نفسى ومعظم اللى معايا حصلهم كدا أول مادخلت قدام ظابط أمن الدولة قدامى الظابط وورايا 2 مخبرين بينده كلا منهم (فرج) الحوار الظابط : أهلا يا حبيبى أهلا بزعيم العصابة والشغل دة أنا : مافيش كلام الظابط : قوللى يا محمد ايه اللى وداك طلعت حرب أنا : أنا كنت رايح عشان .... هوة : ضرب بالقلم وضرب على الرأس الظابط : ايه اللى وداك قول ماتخافش أنا : انا لو أتكلمت هاتضرب الظابط : ضرب فوق الراس والبالقلم كل مانطق كلمة يضرب حتى لو هوة اللى عاوزنى اتكلم المهم قاللى هات الأكونت يا ك. أمك أنا : مش معايا أكونت هوة : فرااااااااااااااااااااااااج فرج : ضرب .. تحرش جنسى ... مسك من العضو التناسلى وفعص فى الخصية انا : مش معايا أكونت الظابط : فرج قللعه البنطلون طبعا الكلام دة انا ماكنتش قولته لصحابى اللى ممسوكين معايا لحد دلوقتى عشان ما أاثرش على حد فيهم والله أعلم حصلهم أيه فرج بعد ماقلعنى البنطلون وبقيت عريان تماما من تحت شغل جمبى الكهربا سلكتين فى بعض ساعت ماسمعت الكهرباء قولتله على الاكونت والباسوورد شاف الكلام اللى كنت كاتبه لقيتهم مرة واحدة كهربونى فى الخصية وفى صدرى وفى أعضاءى التناسلية كنت أفقد الوعى يفوقونى بالأقلام والضرب الكلام دة اتعاد معايا حوالى 5 مرات يعرضونى على امن الدولة ومايخلينيش حتى أقول كلمة ويضرب جايبنى يعذبنى مش يسمع منى بعد ماخلص معانا تحقيقات أمن الدولة ودونا على قسم الدرب الأحمر واحنا معصوبى العينين ومتكتفين خلفى قعدنا ليلتين على البلاط بنص كم من غير أكل ولا شرب كنا نبقا عاوزين نخش الحمام ياخدنى ويمسكلى عضوى التناسلى ويقوللى أعمل أنا طبعا ماعملش وأقوله عملت فضيلنا ليلتين كدا لحد ما ملازم فى قلبه رحمه شوية كان بيطلعنا الحمام وجابلنا أكل فول وطعمية بس يعتبر أكل والحمد لله وبعد كدا أتعاملنا بقا المعاملة الحلوة لما حقوق الأنسان والمحامين عرفوا أحنا فين وجولنا هية دى شهادتى واللى حصللى أنا عاوز أقول كلمة لو واحد ضدنا وكل حاجة وعرف اللى حصللنا يخلى فى قلبه رحمة ومايقولش (ايه اللى وداهم هناك ) ويستاهلوا والكلام دة ولو هاتقول كدا بكرة دا يحصللك فى عيالك او انتا او ابوك او امك لأن الداخلية دلوقتى مابتفرقش بين مؤيد ومعارض !! شكرا