أرسلت (ك.ز) إلى افتح قلبك تقول: أنا شابة عمرى 22 سنة, أعجبت بجارنا وهو عمره 24 سنة, فكرت فى طريقة نتعرف بها على بعض, فعملت لنفسى (أكونت) غير حقيقى على الفيس بوك وأضفته عندى, وبدأنا نتكلم لكن طبعا من غير ما يعرف شخصيتى الحقيقية, لأنى كاتبه اسم (دلع) وقلت له بيانات مختلفة عن أسرتى وأهلى, لأنه جارنا ويعرف أهلى وأخويا كويس جدا, وإحنا ناس كويسين وسمعتنا معروفة فى منطقتنا والحمد لله. المشكلة أنه بدأ فعلا يتعلق بيا, وطلب منى أكتر من مرة إنه يكلمنى فى التليفون, أو يقابلنى عشان نتعرف على أرض الواقع, وأنا طبعًا كل شوية أتحجج بأى حاجة وأؤجل, لدرجة إنه بدأ يشك أنى واحد صاحبه وعامل فيه مقلب. أنا كنت عايزه ألفت انتباهه ليا, وأهو حصل, وبدأ فعلا يقول لى إنى بقيت مهمة بالنسبة له وغالية عليه, لكن دلوقتى خايفة أقول له على الحقيقة فيشك فى أخلاقى ويبعد عنى, وأخسره إلى الأبد بعدما بدأ ياخد باله من وجودى, أو إنه يروح يقول لأخويا أو لأهلى, بجد هاتجنن ومش عارفة أعمل أيه, عند حل يا دكتورة؟ إلى (ك) أقول: فى البداية خلينى أسألك أنت كانت نيتك أيه من الموضوع ده فى الأساس؟ أنت عاملة الأكونت بتاعك ده ليه؟, كنوع من أنواع التعارف والتواصل الاجتماعى السليم؟ يبقى المفروض إن الأكونت يتعمل بمعلومات صحيحة, يعنى اسم صحيح, بيانات صادقة, حتى لو كنت عايزه الناس ماتعرفش كل حاجة عنك, كان ممكن تخفى بعض المعلومات عن الآخرين, كل مواقع التواصل وخاصة (الفيس بوك) بتديكى الخاصية دى, أنك تعلنين عن أنت عايزاه, وتخفى البيانات الأخرى, بما فيهم حتى صورتك الشخصية, إذا أنت غير مضطرة للكذب أو التمويه عن شخصيتك فى حالة إن نيتك سليمة من الموضوع. أما الناس اللى بتعمل (أكونتات) أو حسابات بأسماء دلع أو مستعارة, واللى بتكتب فيها بيانات أى كلام, فدى بصراحة ناس أنا نفسى بأشك فى أمرهم, أيه اللى يخلينى أخبى شخصيتى الحقيقية إلا إذا كنت عايز أدخل أقول أى كلام, وأتعرف على أى ناس, وأعمل أى حاجة مش مضبوطة من غير ماحد يقدر يعرف أنا مين.. بمنتهى الأمانة شىء مريب, خاصة لما تكون صاحبة الأكونت بنت, لو كنت عايزه تتكلمى صح, وتقولى رأيك بصراحة, وتتعرفى على ناس محترمين وجادين, يبقى لازم تكونى أنت جادة وواضحة وصريحة م البداية. دى حاجة, الحاجة التانية لما أضفتى جاركم ده وبدأتى تكلميه كنت عايزه أيه من ورا الموضوع ده؟, أنت بتقولى إنك كنت معجبة بيه, طيب هل كان قصدك أنك تتعرفى عليه أكتر وهو يتعرف عليك, فده يكون سبب أو طريق لارتباطكم فى المستقبل؟, لو كان كده يبقى من باب أولى إنك تعرفيه أنت مين, وتتكلمى معاه على حقيقيتك, عشان لو هو أعجب بشخصيتك تبقى لفتى انتباهه ليكى أنت مش لواحدة تانية, لكن اللى حصل إنك كلمتيه وشغلتيه زى أى واحدة تانية على النت, لا يعرفك, ولا يعرف حاجة عن حقيقتك, ويمكن صورتك تتهز فى عينه لما يعرف إنك كنت بتكدبى عليه, ده لو هو كان صادقا ونيته خالصة فى التعرف عليك أصلا. الموضوع ده مالهوش غير حل واحد, إن حضرتك تصارحيه بمنتهى الوضوح إنك فلانة, وإنك عملتى كده خطأ منك, أو جهلا منك بخطورة الموضوع, وإنك كان قصدك سليم من البداية فى التعارف, وبعدها اقفلى الأكونت ده تماما وافتحى لنفسك واحدا جديدا, باسمك الحقيقى, وبياناتك الصحيحة لو حبيتى تضيفيها, وفى الحالة دى هاتكونى ضربتى عصفورين بحجر, صلحتى الوضع السابق (الخاطئ) والكاذب, وكمان هاتتأكدى من نيته فى الكلام معاكي, فهو طالما عارفكم وعارف أخوكى وأهلك يبقى هايتكسف أو هايخاف يغلط معاكى فى أى شىء, وهايفكر ألف مرة قبل ما يتسلى معاكى زى ما أى ولد بيعمل مع أى بنت مايعرفهاش على النت. الصراحة هى الحل الوحيد فى المواقف اللى زى دى, ده لو كانت نيتك ونيته سليمة وصحيحة, أما (الأسماء المستعارة) أو (الدلع) أو (الشخصيات المبهمة) دى كلها أشياء مريبة وماتطمنش على الإطلاق, وعلى فكرة ممكن (تلم) حواليكى ناس مش مضبوطة كتير على النت, وهاتكونى جبتى لنفسك مشاكل ووجع دماغ من الهوا. للتواصل مع د. هبة وافتح قلبك: [email protected]
