أحمد ماهر في رسالة من محبسه: متضامن مع صباحي ضد هجمة فلول مبارك وأنصار السيسي.. ومش هعمل زي «تمرد»

ماهر: الكاس دوارة يا برنس.. ومش قصدي الشماتة بس لازم نعرف إن التخوين وقت الخلاف «كارثة»
نحن في وقت حرج بيتم فيه تصفية كل من له علاقة ب 25 يناير.. والسؤال دلوقتي: هل ممكن حملة تخوين «حمدين» تخلي الناس تفوق
أعلن الناشط السياسي أحمد ماهر مؤسس حركة شباب 6 إبريل، تضامنه مع حمدين صباحي مؤسس التيار الشعبي ضد ما وصفها بهجمة فلول مبارك وأنصار السيسي ضده بعد إعلانه الترشح للرئاسة، مؤكداً أن تضامنه مع صباحي جاء رغم اتهامات أعضاء التيار الشعبي وحملة حمدين له بأنه "طابور خامس" و"خلايا نائمة".
وأضاف ماهر في رسالته المنشورة على مدونته الخاصة بنشر كتاباته من داخل محبسه ب " ليمان طرة " أنه على الجميع أن يدركوا أن التخوين عند الخلاف السياسي "كارثة" معلقاً "مش هعمل زي "تمرد" اللي هي التيار الشعبي اللي هم برضه أنصار حمدين , وأقول متضامن مع المعتقلين ماعدا ماهر لأنه خاين وطابور خامس وخلايا نائمة" .
وفيما يلي نص الرسالة:
الكأس دوارة يا برنس، ومن حفر حفره لأخيه وقع فيها، واللي بيته من إزاز مايحدفش الناس بالطوب، وتيجي تصيده يقوم يجي واحد تالت يصطادكم إنتوا الإتنين، وأُكلت يوم أُكل الثور الأخضر، ذوقوا مما صنعت أيديكم، ومن سَن سُنة سيئة ميزعلش لما يلبسها بعد كده، واللي عايز الدح مايقولش أح، واللي بتعمله في الناس هيتعمل فيك .
أقاويل مأثورة وغير مأثورة جت في بالي أثناء قراءة مقال "سعيد الشحات" في اليوم السابع , وهو يدافع عن "حمدين صباحي" ضد الحملة الشعواء التي يشنها أنصار السيسي وبالطبع مبارك ضد حمدين .
فقد اتهموا "حمدين" بأنه طابور خامس وخلايا نائمة لمجرد أنه لا يزال متمسك برغبته في الترشح للرئاسة, وأنه لن يدعم السيسي إلا بعد تبني السيسي لبرنامج يدعم مطالب الثورة.
واستنكر الكاتب "سعيد الشحات" أن فلول مبارك وأنصار السيسي يتذكرون فقط أن حمدين تحالف مع الإخوان في الإنتخابات البرلمانية في 2011 , و لم يتذكروا أنه أحد أهم رموز جبهة الإنقاذ التي قادت التحرك ضد الإخوان , و أنه من أهم أحد رموز 30 يونيو التي أطاحت بحكم الإخوان.
بالضبط مثلما يتذكر فقط سعيد الشحات وأنصار حمدين صباحي أن أحمد ماهر و 6 إبريل عصروا ليمون وانتخبوا مرسي في يونيو 2012 , ولا يتذكر سعيد الشحات و أنصار حمدين صباحي أن أحمد ماهر و 6 إبريل عارضوا الإعلان الدستوري في نوفمبر 2012 , و أن ماهر إنسحب من التأسيسية وحشد ضد دستور الإخوان في أكتوبر 2012 ، و أن ماهر و 6 إبريل عارضوا حكم مرسي من وقتها , وشاركوا أيضاً في جمع إستمارات تمرد , وشاركوا بقوة في 30 يونيو قبل أن نعرف الخديعة التي تمت .
اللهم لا شماته ، بجد مش قصدي الشماته في الهجوم اللي بيحصل على "حمدين" دلوقتي من فلول مبارك وأنصار السيسي ، ولكن لازم الناس تعرف إن التخوين عند الخلاف السياسي يعتبر كارثة , ولذلك فأنا أتضامن مع "حمدين صباحي" و أنصاره في مواجهة الهجمة الشرسة والتخوين من قبل فلول مبارك وأنصار السيسي .
مش هعمل زي "تمرد" اللي هي التيار الشعبي اللي هم برضه أنصار حمدين , و أقول متضامن مع المعتقلين ماعدا ماهر لأنه خاين وطابور خامس وخلايا نائمة .
ولا هروج شائعات الطابور الخامس والخلايا النائمة زي ما عمل معايا أعضاء تمرد والتيار الشعبي وحملة حمدين .
لأن الوضع ده مقرف بالفعل ، التخوين شئ سيء , ولازم الناس تتوقف عن تلك العادة التي أصبحت أسهل شئ عند أبسط خلاف سياسي .
ورغم كل التخوين والسباب والإتهامات التي روجها أنصار حمدين عني, إلا أني أرفض هجوم الفلول عليهم وتخوينهم لحمدين و إتهامه بأنه طابور خامس ونسيان تاريخه النضالي .
مهما إختلفت مع أداؤه السياسي أرفض تخوينه .
ومهما سبني أنصاره في تمرد والتيار الشعبي و روجوا عني الأكاذيب عند أول خلاف في الموقف, أرفض أيضاً التطاول على حمدين وأنصاره, خصوصاً إننا في وقت حرج بيتم فيه تصفية كل من له علاقة ب 25 يناير .
والسؤال دلوقتي ..
هل ممكن حملة التخوين ضد "حمدين" تخلي الناس تفوق وتعرف إن التخوين ملوش كبير ؟؟!!
وإنك هتزايد على حد النهاردة هتلاقي بكره اللي يزايد عليك ؟؟
وإنك لما ترفض التضامن مع واحد محبوس ظلم النهارده , بكره هتلاقي اللي يرفض يقف معاك وقت حبسك ظلم ؟؟!
هل ممكن ؟؟!!
أتمنى .