«قتلتها بعد ما سقتنى أنا وأخواتى المر وكرهتنا فى عيشتنا، كنت لازم أخلص منها عشان أحمى أخواتى الصغيرين، ضحيت بنفسى عشان أخواتى يعيشون بعد ما أبونا سابنا لمراته الجديدة تعذبنا وتذلنا . بتلك الكلمات بدأ «أشرف.م » يدلى باعترافاته أمام المستشار وائل مهدى رئيس نيابة السلام حول واقعة اتهامه بقتل زوجة أبيه بسبب تعذيبها لأخواته الصغار وإهانتها بأمهم المتوفية. وقال المتهم فى أقواله: أنا الأخ الأكبر لأخواتى وبعد ما والدتنا توفت، أبونا اتجوز واحدة تانية، رغم إنى اعترضت وقولتله مش عايز حد مكان أمى وأنا هاخذ بالى من أخواتى الصغيرين لكن والدى رفض كلامى واتجوز. وأضاف المتهم: من أول يوم لزوجة أبويا فى البيت عندنا وبدأت تتعامل معايا ومع أخواتى بقسوة وكنت دايمًا أول ما برجع من الورشة ألاقى أخواتى قاعدين فى الأوضة وقافلين على نفسهم ومش عايزين يتكلموا مع حد وأول ما أسأل أى واحد منهم عن سبب غضبهم يروحوا كلهم يبدأوا فى البكاء بشكل هيسترى وبعدين يشتكوا من أن زوجة والدى بتعذبهم وبتضربهم وبتشتم أمى المتوفية، لحد ما فى يوم رجعت لاقيت أخويا الصغير ذراعه مكسورة ولما سألته قالى إنها ضربته ولما روحت اشتكى لأبويا راحت زوجته معيطة وقالتله إن أخويا وقع على الأرض وذراعه اتكسر ولما حذرتها من أنها لو مددت أيدها على حد من أخواتى تانى هنتقم منها، راحت معيطة لأبويا واتهمتنى بأنى بهددها وخلت أبويا يضربنى. وأكمل المتهم: ساعتها عرفت خلاص إن أبويا مش هيسمع لكلامى تانى مهما مراته عملت فيا أو فى أخواتى وأنها خلاص نجحت فى أنها تأثر عليه، فساعتها كنت لازم أقرر أنى أخلص من مرات أبويا حتى لو هتسجن بس عشان أقدر أحمى أخواتى الصغيرين كانت كل الفلى مسيطر على أن حياتى مبقاش لها لازمة وأنى لازم أضحى بها وبمستقبلى عشان أدافع عن أخواتى الصغيرين وعشان كده استنيت لحد ما أبويا يروح شغله وروحت دخلت على مرات أبويا وخنقتها وعشان أضمن أنها خلاص ماتت روحت طعنتها بالسكين فى رقبتها وبعدين روحت جريتها لغاية غرفة النوم ووضعت جثتها تحت السرير وبعدين نزلت لشغلى. واختتم المتهم: كنت عارف إن اللى عملته هينكشف هينكشف فحكيت لزملائي فى الشغل وقررت إنى أسلم نفسى للشرطة بعدها، أنا مش مجرم أنا كنت بحمى أخواتى الصغيرين اللى ملهمش حد غيرى وخلاص أنا كده ارتحت إن مفيش حد هيعذبهم تانى ولا هيضربهم. وقال أحد الجيران ويدعى «حسن.م » حول الواقعة: أشرف طول عمره فى حالة وبيجرى على أكل عيشه وعمره ما تعرض لحد من السكان بالسوء والناس كلها تشهد له بالأدب والاحترام، لكن الست اللى اتجوزها والده على طول كنا بنسمعها وبنشوفها وهى بتضرب أخوات أشرف الصغيرين بسبب ومن غير سبب لدرجة أننا تدخلنا كجيران أكثر من مرة عشان نحمى الأطفال لكنها اشتكت لزوجها اللى اتخانق معانا بسببها وده اللى خلانا مندخلش تانى. تم تحرير محضر بالواقعة وإحالة المتهم إلى النيابة التى أمرت بحبسه 4 أيام على ذمة التحقيقات.