موظف يقتل شقيقته لرفضها إعطائه أمواًل لشراء المخدرات

«مكنش هدفى أقتلها، دى أختى وأنا وهى ملناش غير بعض فى الدنيا، أنا طلبت منها فلوس عشان أجيب مخدرات لكنها رفضت، ملقتش حل قدامى غير إنى آخد منها الفلوس غصب عنها ومحستش بنفسى غير وهى واقعة على الأرض غرقانة فى دمها وقاطعة النفس».
بتلك الكلمات بدأ ح.س موظف بشركة الكهرباء يروى للمستشار هشام رفعت رئيس نيابة الصف تفاصيل قتله لشقيقته ف.س 40 سنة، خياطة، بعدما رفضت إعطاءه مبلغًا ماليًا لشراء مواد مخدرة.
وقال المتهم فى اعترافاته: أنا بحب أختى جدًا وطول عمرها وهى سندى فى الدنيا، رغم إن أنا الراجل بس هى كانت على طول بتساعدنى وتقف جنبى وكانت روحها فيا وأنا كمان ما كنتش أقدر أعيش من غيرها بس منها لله المخدرات هى اللى خلتنى أقتل بإيدى أعز الناس على قلبى.
وأضاف: من يوم ما بدأت فى تعاطى المخدرات حياتى دمرت، الديون تراكمت علىّ واللى كنت مستلف منه فلوس ما بقتش قادر أسددها لهم بقت الناس أول ما بتشوفنى بتهرب منى وبترفض تدينى جنيه واحد.
وأكمل المتهم: ناس كثيرة معى فى العمل طالبتنى بالفلوس السلف فتوقفت عن العمل ولجأت لأختى لتسلفنى فرفضت لأنها عرفت إنى أشترى بالفلوس مخدرات.
واختتم المتهم: يوم الحادثة روحتلها البيت وهى كانت قاعدة على ماكينة الخياطة، ومكنش فى حد فى البيت غيرنا، طلبت منها فلوس بحجة إنى علىّ ديون لناس وحالفين إنى لو ما رجعتش لهم الفلوس هيبلغوا عنى الحكومة، لكنها رفضت تدينى حاجة وقالت لى حرام علىّ أديك فلوسى اللى بشقى بهم عشان تجيب بهم مخدرات تشربها وتضيع بهم مستقبلك، وبدأت تهزأنى وتشتم فيا وتقولى إنى مش راجل وإنى خربت بيتى وضيعت وظيفتى وأنها مش عايزه تعرفنى تانى، لأنى جلبت لها العار، فلم أشعر بنفسى غير وأنا أهجم عليها لآخد منها فلوس غصب عنها ولما رفضت جريت على المطبخ وأحضرت سكينة لأهددها فضربتها بها فسقطت غارقة فى دمها.
ضباط مباحث مركز شرطة أطفيح، كانوا قد تلقوا بلاغًا يفيد بمقتل سيدة فى الأربعينيات، نتيجة إصابتها بعدة طعنات نافذة بالصدر والرقبة.
وكشفت التحريات أن وراء ارتكاب الجريمة شقيق المجنى عليها ويدعى ح.س موظف بشركه الكهرباء، بعد أن رفضت شقيقته إعطاءه مبلغًا ماليًا لشراء المخدرات.
تم تحرير محضر بالواقعة، وإخطار النيابة التى أصدرت قرارها بحبس المتهم 4 أيام على ذمة التحقيقات.