قتل صديقه بسبب دور دومينو ومشاريب

لم يكن يعلم أن رهانًا سيجعله يقتل أعز أصدقائه، ولكن تسلل الشيطان بينهما، ووسوس إليه كى يخرج مطواة ويطعن بها قلب صديقه بعد أن خسر رهانه.
وقف «إسلام.ع» وعلامات الدهشة تكسو وجهه وهو يدلى باعترافاته أمام نيابة شرق القاهرة الكلية فى جريمة قتله لصديقه بعد مشاجرة نشبت بينهما بسبب لعبة الدومينو على إحدى المقاهى بالمطرية.
وقال المتهم فى اعترافاته «مش عارف إزاى قتلته والله ما كنش قصدى، ده أعز أصحابى، طول عمرنا وأحنا متربيين مع بعض وعايشين مع بعض، معرفش إزاى عملت كده، اسألوا حتى الناس هيقولوا لكم إننا طول عمرنا وإحنا أكتر من الأخوات، وعمرنا ما زعلنا ولا اتخانقنا مع بعض، والله كانت لحظة شيطان».
وأضاف «أحنا كنا قاعدين على القهوة زى كل يوم، بنقعد نفطر ونشرب حاجة، وساعات بنلعب دومينو عشان نضيع فى وقتنا، لأننا بنشتغل يومًا وعشرة لأ».
وتابع «فى اليوم ده كنا «سمن على عسل» مع بعض والناس كلها على القهوة تشهد بكده، وبعدين قولنا نجيب فطار ونشرب حاجة، وبعدين قالى تعالى نلعب دور دومينو ونتراهن؛ اللى هايخسر يدفع حساب الفطار والمشاريب، فوافقته مع إن مكنش معايا فلوس كفاية عشان أحاسب، بس أنا كنت أحرف منه فى لعب الدومينو وماكنتش متوقع إنى هاخسر الرهان أبدًا».
واستطرد إسلام «بدأ يكسبنى وأنا كنت حاسس أنه بيغش لكنى سبته وفى الآخر بعدما خلصت اللعبة لقيت نفسى خسرت، وبدأ يستفزنى ويقولى يلا حاسب يا زبون، وبعدما رفضت أنى أحاسب لأنى ماخسرتش لأنه كان بيغش فى اللعب، لقيته راح نادى على القهوجى وقاله إن الحساب عندى وساعتها قلتله بينى وبينه مش معايا فلوس كفاية عشان أحاسب، وطلبت إنه يدفع عشان شكلى أمام الناس، لكنه رفض وصمم إنى أنا خسرت الرهان ولازم أحاسب على المشاريب».
واختتم المتهم «كان مصممًا بشكل عجيب أنه يدفعنى ثمن الحساب، رغم أنى قلتله مش معايا فلوس، وبدأ يتكلم معايا بأسلوب مستفز ويعلى صوته، وبعدين شتمنى ومسك فيا، رحت ضاربه وطلعت المطواة من جيبى وضربته بيها فى قلبه ضربة واحدة عشان أسكته فتفاجأت بيه بيقع فى الأرض والناس اتلمت عليه وحاولوا يفوقوه، وأنا كنت واقفًا متسمر مكانى مش مصدق أنى أنا اللى ضربت أعز أصحابى وقتلته بالمطواة اللى كنت بدافع عنه بيها».
كان قسم المطرية قد تلقى بلاغًا بالواقعة، وتم تحرير المحضر اللازم وإحالة المتهم للنيابة، التى أمرت بحبسه 4 أيام على ذمة التحقيق.