رحلة في ضمير أحد الفلول!

مع الفلول انت أكيد كسبان. الثورات كلها أثبتت إن الفلول مكسب .. أقولك إزاي؟!
بالعقل كده .. مش الثورة دي ممكن يا إما تنجح يا إما تفشل .. صح؟
وممكن يا إما توصل للحكم .. أو يا إما توصل للسجن؟ّ!
طيب .. شوف كل تجارب الثورات "السلمية" ح تلاقي إنها لما بتوصل للحكم بتصدر عفو عام عن كل اللي وقفوا ضدها .. عشان هي "سلمية" زي ما هيا بتقول .. صح ولا لأ؟
طيب ليه بقا أقف مع ثورة إذا وصلت للحكم ح تصدر عفو عني مهما عملت؟....
دا أنا ممكن أقول إني أصلا كنت مع الثورة من الأول .. زي ما كل الناس بتعمل .. والثورة أكيد ح تنسي...
يعني الثورة أصلا بتحرق نفسها .. لأنها أكيد ح تصدر عفو عام لما تنجح .. و ح تسبني في حالي مهما عملت .. يبقى ليه ما أعملش .. إذا كان هي أصلا ح تسامحني في الأخر؟!
أما بقا لو فشلت الثورة .. ووصلت الثورة للسجن .. فأنا برضه ح أكون في السليم .. لأني كنت مع النظام الديكتاتوري من الأول .. وساعتها أقدر أقول إني ساهمت في إفشال الثورة ...
يعني في الحالتين أنا كسبان كسبان ...
والمثل بيقول لك: "لا تكن أول من يعصي ولا أخر من يطيع...."
خد بالك بقا من الناس اللي مؤيدة للثورة .. دول بقا ماشيين في خط واحد .. وحطين كل فلوسهم في رهان على حصان واحد .. ولو خسروا ح يتبهدلوا .. أما لو كسبوا .. ح يكون زيهم زيي بالضبط...
يبقى ليه بقا ما أكونش مع الفلول .. لما أنا كسبان كسبان .. سواء نجحت الثورة .. أو فشلت؟...
بينما لو كنت مع الثورة .. يبقى ممكن أخسر خسارة شديدة .. في حال فشلت الثورة .. وده مش تفكير واحد فهلوي صايع بجد زيي كدا....بس انت عارف؟...
لو إن الديكتاتور عمل زي الثورة .. وقال إنه ح يصدر عفو عام لما يكسب .. ح أكون أول واحدا يسيبه ويؤيد الثورة .. لأني كده ضمنت الأمان....لكن طبعا كلنا عارفين ان الديكتاتور مش بيسامح اللي بيقف ضده .. وإنه أكيد ح يعاقب كل اللي وقفوا مع الثورة .. لما هو يكسب والثورة تفشل....
يبقى الأسلم لي إني أؤيد مين؟ ...
محدش يكلمني عن مصر .. أنا المهم عندي نفسي وعيالي ومصالحي أنا وبس....
وبالراحة كده .. محدش يكلمني عن كرامة المواطن .. والحرية .. والكلام ده...
ما إحنا طول عمرنا بنضرب بالجزمة وساكتين .. اشمعنى دلوقتي اكتشفنا انها بتوجع....
وإيه يعني مثلا لما أخد شلوت ولا شلوتين ولا قلم ولا قلمين .. من ضابط محترم ولا عسكري شريف؟....
هما مش دول أولادنا برضه .. وبعدين أنا هتفت في العباسية وقلت جزمة الجيش على راسي من فوق .. مش على قفايا بس....
وبرضه العين ما تعلاش على الحاجب .. وأقل واجب إننا نسلمهم قفانا.. وحنفضل كده....
وبعدين ما أنا برضه بأقول رأيي زي بتوع الثورة وأكتر .. لأني بأشتم اللي مش بيعجبني في الثورة وبأعبر عن رأيي وأزعق .. زيي زيهم بالظبط .. يبقى إيه الفرق بيني وبينهم؟