«وليد» يقتل صديقه لاختلافهما على «حساب البلياردو»

«كانت لحظة شيطان، لم أكن أقصد قتله، طلعت المطواة من جيبى عشان أهوشه بيها، لكن لقيتها اتغرست فى صدره».. الوعى الذى غيبه الغضب خلال الحادث، كان، بكل تأكيد، حاضرًا فى اعترافات قاتل صديقه وإن كان يتمنى أن يكون كابوسًا، وليس حقيقة.
وقال المتهم (وليد.ع)، 18 سنة، أمام نيابة مركز الصف بالجيزة «كنا دائمًا متعودين أنا وأصدقائى بالمنطقة، أن نذهب إلى أحد محال البلياردو والبينج بونج عشان نرفه عن نفسنا شوية، من كتر الشقى اللى إحنا شايفينه والهموم اللى شايلنها على أكتافنا واللى خلت الواحد يكبر بدرى».
وأضاف «الدنيا مغلسة أوى معايا، يوم بشتغل وعشرة لا، ومش عارف أعمل حاجة عدلة فى حياتى، عشان كده خلقى بقى أضيق من خرم الإبرة، وبقيت متعصبًا على طول ومش طايق كلمة من حد، وطارق كان صاحبى وأعرفه من زمان، وكان هو اللى بيلح علىَّ كتير عشان نروح نلعب بلياردو، ننسى بيها الهم اللى ملازم حياتنا، وكنا فى وقت اللعب بتحصل مشاكل وخناقات كتيرة عادية زى اللى بتحصل كل يوم بين الصحاب، وساعات كانت تتطور الخناقة أو المشكلة فى لحظة شيطان زى ما حصل معايا، وكان ممكن حد يعور حد، بس كانت الدنيا بتتلم بعد كده وبنراضى بعض».
واستطرد المتهم «يوم الخناقة كانت فيه مشاكل جامدة بينى وبين أبويا فى البيت بسبب سهرى كتير خارج البيت والفلوس اللى باستلفها من أخواتى عشان كانت الحالة المادية نايمة معايا خالص، عشان مابقاش فى شغل فى البلد زى الأول، خناقتى مع أبويا وقلة الشغل والفلوس خلت روح الواحد تبقى فى مناخيره، فتركت البيت لأبويا وقلت أنزل أقعد ما أصحابى على القهوة عشان ما تحصلش مشكلة فى البيت».
وأكمل «وبعد ما أخذنا قعدتنا عل القهوة، رحنا محل فى المنطقة نلعب بلياردو، وهناك لقيت طارق، فقالى تعالى نلعب واللى يكسب هو اللى هيحاسب على اللعب، لعبت معه لكنه كان بيخمنى وبعد ما كسبنى قالى يلا عشان تدفع يا زبون، وقتها ماكانش معايا فلوس أدفعها فقلت له أنت حرامى وبتسرق فى اللعب وأنا مش هدفع حاجة، وكلمة منه على كلمة منى قامت بيننا خناقة، فطلعت المطواة من جيبى عشان أهوشه بها، لكن معرفتش أزاى غرستها فى صدره، ما كنش قصدى اقتله، كنت بأخوفه بس، لكن الشيطان هو اللى خلانى أغرسها فى صدره واقتله».
كان رئيس مباحث مركز شرطة أطفيح، تلقى بلاغًا من مستشفى أطفيح العام يفيد بوصول جثة شاب يدعى (طارق.س)، 16 سنة، عامل، مصاب بجرح نافذ بالصدر أودى بحياته.
وبسؤال عم المجنى عليه ذكر أن شابًا يدعى وليد، عاطل، طعن القتيل بمطواة، بسبب خلاف بينهما على لعب البلياردو، وبعد ضبطه واعترافه أحيل المتهم للنيابة التى قررت حبسه 4 أيام على ذمة التحقيق.