مصر تفوز بجائزة أسوأ فساتين فى تاريخ الأوسكار.. ماذنب_الريد_كاربت؟!

وصلة من السخرية طالت نجوم مصر الذين حضروا حفل جائزة الأوسكار فقد نشرت اسراء أحمد علي صفحتها الخاصة بموقع التواصل الاجتماعي الفيس بوك قائلة: حضرتك احنا صحيح مفزناش باوسكار افضل فيلم وثائقى بس فزنا باوسكار أسوأ فساتين فى تاريخ الاوسكار كلها يافندم !! حضرتك ركز معايا م الشمال كده شايف البت ام فستان اخضر .. ده كان مشروع ستارة والحمد لله فشل ولحقنا الستارة على اخر لحظة فقولنا نعمله فستان .. أما بقى الفستان اللى جمبها ابو لون زي ال... فأنا مش هتكلم عليه! وجنبها فستان موف هاند ميد عشان الاحداث ؟!! .. والبلرينة السوده اللى انتى لبساها برده مش هكلم !! هنالك بقا طنط فيفى عبده اللى واقفه جمبها دى فدى كان قدامها حلين ياتخسس هذا الكرش المصرى الاصيل يا تختار فستان يدارى ديفوهاتها الاعظم بس هى عرتنا واختارت حل تالت وهو الاستايل التحفة اللى شايفينه قدام حضراتكوا ده ! بالمناسبة سورتك باينه والله ياماما ! .. عدى بقا الواد السفرجى ده هيستوقفك كده فستان حوامل .. ايوووووه .. عارفة حضرتك اخر مرة مامى لبست الجلابيه العظيمة دى ابويا معمرش كتير بعدها !! ..زووووووووم بقا ع الفستان ابو شراشيب اللى جمبه ده .. حضرتك فيه فتلة طويلة جدا على استغفر الله العظيم يعنى ال #red_carpet مقولتيش ليه لاختك صاحبة العباية المريحة اللى جمبك توطى تقطعهالك بسنانها او اخوكى العاطفشى المنسجم اللى جمبك برده يولعهالك بالولاعة .. والنبى مايجرى حاجه !! اما بقا الاخت الاخيره فحضور فستان بنص كم اعتقد فكرة مهببه لاوسكار عالمى!! ده كان ناقص يبقى بلياقة .. رسالة بقا موجهة للجميع : يعنى والله لولا الريد كاربت العظيمة اللى واقفين عليها كنت فكرت ان الصورة من فرح سوزان بنت خالتكوا على مركب فى النيل !!! كنتوا قولولى اسلفكوا فستان خطوبتشى بدل أتيلية أبو أدهم ده.. والمصحف مكنت هستخسره فيكوا .. قطيشعة .. يالا اهو نعزى نفسنا ويكفىنا شرفاً ان أخونا فى الله Bradley Cooper بذات نفسه قدم الفيلم وقال #the_square وهو ده الشئ الوحيد العظيم اللى طلعنا بيه .. ثانكيو فيرى ماتش فور ذيس ايجيبشن عاااار !
وطالته الكثير من التعليقات ما بين السخرية من ملابس ممثلين لمصر بالحفل وما بين العتاب علي هجومها الشديد عليهم