الجمعة تنشر قصيدة الابنودى الجديدة

انزل لاخواتك في الميدان
كلاب الشر نهشوا لحم اخوك
عروا اختك
والدور علي امك وابوك
وانت رغم دا كله ساكت
مصر لو مسكوها دول
تبقي ماتت
======
مصر دعوه طيبه والانبياء بتقول امين
مصر مش للكدابين مصر يوسف والحسين
رغم جب السجن فيها وبحر دم
بس لسه في بطنها للغد حلم
ولا عمرها بتقبل بظلم
مهما حاولوا يغيبوها ويقتلوها
مهما حاولوا يشوهوها
بالفتن المجهده
مهما حاولوا العذرا عاشقه السيده
وابقي دور عن وطن يا اللي عاوز تستقر
لو صحيح عاوز بلادك تبقي حره استمر
وانت هتكون التمن
هو دا سعر الوطن
والكلام للي ثائر مش جبان
انزل لاخواتك في الميدان
==============
جوه الميدان لون القلوب ابيض كما لون الحمام
رمز السلام
وابقي قولي يا اللي بتساوم علي ابنك وعرضك
لونك ايه؟؟؟
يا اللي بتدوقنا من حنضل سكاتك
ووصفتنا باسوء صفاتك
لونك ايه؟؟؟
ما انت دوقت عذاب سنين
ليه تبقي خنجر في قلوب الطيبين
وترجع الخوف اللي كان
انزل لاخواتك في الميدان
===============
وانت يا ثائر بلادي
ياللي عاوز تبقي مهر امان ولادي
وللاسف بيشوهوك
ايوه باسم الدين بعوك
هونت وف نفس الميدان سلموك
وفي طريقهم للكراسي خونوك
وبيدبحوك
وانت رغم دا كله بتكمل طريقك
قدرك يكون الموت صديقك
واللي خلق الخلق شايف
ملكهم زايل وزايف
يكفي انه لسه خايف
وانت قلبك فيه امان
انزل لاخواتك في الميدان
===============
انزل وسلم ع العيال الشقيانين
البردانين علشان في عز البرد
نبقي دافيانين
انزل وحقق حلم ابوك
دا اللي بيضحي اخوك
حط ايدك فوق كتافه واساله
انت ليه دايما حزين
واوعي تسمع للي خان
انزل لاخواتك في الميدان