انا نفسي ابقي ريس

انا نفسي ابقي ريس انشا الله نص ساعة
واسكن في قصر تحفة واطلع في الأذاعة
منا اصلي واد حلنجي ليا في شغل الصياعة
شعبي ياكل ويشبع وامسح لفظ المجاعة
انا نفسي ابقي ريس انشالله نص ساعة
اروق فيها نفسي واظبط الجماعة
اخوانجي ليا فيها وابقي المرشد كمان
او سلفي برضة يمشي واظبط الميزان
اما الاحزاب حبايبي انا واد علي كل لون
اول قرار راح اخدة راح اقفل الميدان
ومفتاحة هبيعة دة ربالي الجنان
ثورة ووجع دماع دوشة من غير اوان
انا نفسي ابقي ريس والخلق تنتخبني
اما الكبير اخويا وصغيرهم دة ابني
ايدك في ايديا يلا نعمر بلدنا ونبني
اوعاك تقول يا صاحبي دة شغل اراجوزات
ساعتها اقول يا دمك ابوك السقا مات
دة انا واد ريس ادارجي لو يوم تديني صوتك
هطلع بيك البرنجي لو ترفض يبقي موتك
بتكلم سبع لغات والمصري واللاوندي
يلا اديني صوتك رشحت نفسي ليك
لا يوم نفعت نفسي ولا يبقي فضل ليك
ولا عمرك تبقي فرخة ولا عمري هبقي ديك
انا نفسي ابقي ريس ان شالله ربع ساعة
انا نفسي ابقي ريس دة انا واد ملعب جدع
ولما ابقي ريس راح اعمل البدع
راح اجوز الصبية واوظف الجدع
واعرف اسرار فؤادك واوشوش الودع
وهخلي العملة دية باليورو والدولار
اما الجنية الفقري احلف ما يخش دار
انا نفسي ابقي ريس انشالله عشر دقايق
منا اصلي واد خلاصة ودماغي لسة رايق
والشعب بتاعنا دايما بعد ثورتنا فايق
ممكن اروح في توكر قبل ما اعد الدقايق
مش عاوز ابقي ريس ملعون ابو الرياسة
يطلع لي واد محفلط ويسوق فيها الغلاسة
وابص الاقي نفسي مدلوق ويا الكناسة
ويجري ع الميدان ويقول دة عاوز لة شيلة
وحياتي بعد بمبي راح تصبح تاني نيلة
وحق من خلقني جلا في علاة تبارك
مش عاوز ابقي ريس ولا احصل يوم مبارك