والدة الشهيد انس محي الدين:سأرفع قضية على حكم المباراة لانه الاساس في تلك الكارثة

1 فبراير 2012 من منا ينسى هذا التاريخ وهذا اليوم المشئوم؟؟ هو اليوم الذي لقب و اشتهر ب"مجزرة بور سعيد"يوم فراق 74 شهيد من شباب هذا الوطن...قتلوا بدون ذنب الذنب الوحيد انهم كانوا ضد النظام الفاسد و دائما يهتفون ضده وكانوا يشجعون ناديهم اينما ذهب!!
قالوا في اغانيهم للاهلي"اديله عمري و برضه قليل.....يوم ما ابطل اشجع اكون ميت اكيد.........عمري عشان الاهلي يهون"وقد كان كل هذا!
74 شاب في عمر الزهور مازلنا نسأل حتى الان بأي ذنب قتلوا؟؟وايضا مازلنا نبحث عن الاجابة!! وفي انتظار حكم رادع لمرتكبي هذه الكارثة
ومن ضمن من استشهدوا في هذه المجزرة "انس محي الدين" الذي لم يتجاوز الخامس عشر من عمره والذي يعد اصغر شهيد في هذه المجزرة
وكان لنا لقاء مع والدته وكان الحوار كالتالي:
1\ممكن تحكي لنا عن شخصية انس وطبعه؟؟
انس الله يرحمه كان طيب جدا وفى نفس الوقت راجل وحنين جدا لوشاف طفل بيبكى يلعبه لحد ما يسكت وينام على ايده ويحب يأكلهم
انس لو شاف غلبان يعطي له كل اللى معاه لانه حاسس به طبعه هادى كريم جدع
2\كان عنده اخوات؟؟
عندة اخت اكبر منه فى الجامعة واخ من ابوه صغير
3\علاقته بهم كانت ازاي؟
طبعا بيحبهم جدا وبيحب يهزر معاهم وحاسس انه راجل على اخته ويغير عليها مع انه اصغر منها
4\ممكن تحكي لنا عن مدى ارتباطه بالاهلي ومتى انضم للالتراس؟؟
انس كان بيعشق الاهلى من وهو صغير وكان نفسه يلعب فيه بس ربنا مأرادش وبيحب الكورة عموما ومتابع الكورة العالمية والمصارعة بيحبها جدا وكان بيتابع كل مواعيدها وكان بيحب جون سينا طبعا بيعشق ابوتريكة جدا وبركات بيحب كل اللاعيبة بس ابو تريكة عشقه و كان بيحلم بيهم من حبه فى الكورة
و انضم للالتراس سنة 2010 اتعرف على مجموعة من الالتراس من اكتوبر وكان بيروح يحضر يشجع معاهم وانضم ليهم
5\اخر يوم شوفتي فيه انس كانت تصرفاته ازاي؟؟
انا كنت اقوله بلاش يروح الاستاد لان الدنيا مش امان وكنت خايفه عليه واتحايل عليه يقولى خلاص مش هروح وانه هيتفرج على الماتش مع اصحابة بره اتفجئت انه راح الاستاد بس قبل فترة قالى اسمعى ياماما كتبت ايه على الفيس" كم كنت اتمنى ان اسمع خبر وفاتى وانا حي" قلت له ليه بتقول كده؟؟ حرام عليك تزعلنى ماتكملش قال حاضر وماكملش لحد ماشوفتها سبحان الله كان حاسس بحب الملايين له سبحان الله والله ما فيه حد اشتكى منه كان زى الملائكة في الارض
6\كنتي حاسة بايه يوم المجزرة ولما شوفتي اللي بيحصل اثناء الماتش و ابنك هناك..وتوقعتي ان يحصل كده؟؟
عمر اللى حصل مايخطر على بال انسان ولوحيوانات ماتعملها الحيوان بيحس باللي زيه مابالك بالانسان؟؟ وهم بعيد اوي عن الانسانية انا كنت بره مصر ولما سمعت وفتحت التلفزيون مصدقتش ان ده حصل اتصلت به مردش عليا اتصلت تانى رد واحد قال انه لقى الموبايل ع الارض اتجننت بس قلت يمكن وقع منه اتصلت بابوه قال انه في الطريق ل"بور زفت" بس بعد كده لما حسيت بالمصيبة بقيت اقول حتى لو متعور مش مشكلة
دى خناقة وحتعدى عمالة دماغى تجيب كل الاحتمالات ولا اتصورت يحصل دة ابدا حيوانات مفترسة هم واللى مدبرها ربنا يحرق قلوبهم ان شاء الله انا هرفع قضية ع الحكم لانه اساس المصيبة كلها لو كان لغى الماتش كانت الناس مشيت قبل الكلاب ماتوصل ويدخلولهم حسبي الله فيهم الى يوم القيامة
7\من وجهة نظرك اللي حصل ده حصل ليه ومن مصلحة مين ومين المتهم من وجهة نظرك؟؟
اكبر دليل فى اللى حصل الداخلية فيهم عملاء انا لما شوفت جزء من ماتش كيما اسوان والاهلى كان نفس المخطط بس مكملش دبروها كويس لما يبقوا بره القاهرة وعند ناس بتكره الاهلى وتكره الفانلة الحمراء وفيه تواطئ من جهات كتير ربنا هينتقم منهم واحد واحد وبكرة نشوف ان شاء الله شباب مالوش ذنب الا انه بيحب الاهلى وياريت حس الاهلى باللي حصل!!
8\رأيك ايه في موقف ادارة الاهلي وكنتي منتظرة يكون تصرفهم ازاي؟؟
كل واحد بيفكر في نفسه بس لو حسوا باللى حموا اللاعيبة وان ممكن يحصلهم اللى حصل لاولادنا كانوا عرفوا انا عايزة اعرف مفيش واحد من اولاد المشهوريين بيروح يشجع ليه؟؟عارفين وساكتين فين اولاد اللى بيقولوا الحى ابقى من الميت؟؟مستخبيين ليه؟؟!!
حقول ايه ؟؟؟كل واحد بيفكر فى نفسه وفي الفلوس بس حسبى الله فيهم كلهم بحق حرقة قلبي على انس الله يرحمه
كرهت كل الدنيا لاحاسة بطعم الحياة اليوم زى امبارح مالحقتش اتهنى به لسه العمر طويل وانا ماليش غيره سندى فى الدنيا حياتى كلها له و لاخته بس مش هقدر اقول غير الحمدلله قدر ماشاء فعل
9\مع ام ضد عودة الدوري قبل القصاص ؟ولماذا؟
طبعا ضد لازم يكون فية حكم الاول وحكم عادل لاننا حاسين ان اولادنا راحوا وراح حقهم لو رجعت الحياة طبيعة و كأن مفيش حاجة حصلت ازاى ؟؟؟اومال اولادنا حقهم فين؟؟؟؟
10\هل تأخر النطق بالحكم يقلقك ام تعلمى انها مجرد اكتمال للاجراءات وتثقي بالقضاء المصرى ؟؟
تأخر النطق قلقنى بس انا عندى ثقة فى القضاء ولكن لو حصل نطق حسب الادلة الموجودة لان فيه سيديهات واضحة كانت الامور اختلفت اقصد ان الادلة واضحة جدا يحاسب عليها القتلة ولو فيه اجراءات اخرى تبحث
11\رأيك فيما يفعله الالتراس هذه الايام؟؟وايه اللي مخليهم يتصرفوا كده من وجهة نظرك؟؟
احنا التراس انا التراس مش ابنى كان التراس انا زى ابنى ولو الالتراس سكت كانت القضية ماتت وانا معاه والالتراس اجدع شباب ولو حصل حاجة لحد وانس عايش كان هيجرى يجيب حق اخه اللى راح الالتراس شافوا الموت بعينيهم ومنهم اللي بيروح لدكاترة نفسيين من اللى شافه انتى عايزة تقوليلى واحد شاف اعز اصحابة بيذبح قدامه و يبقى سليم؟؟!!هم خلاص مش حاسين بالحياة بعد اخواتهم واحنا مين له نفس يعيش بعد اللى حصل؟؟!! انتوا حاسين بأم كانت مستنية ابنها يتخرج بعد شهرين وتفرح به؟؟وهو كل حياتها وسندها
12\تنصحى الالتراس اللى كان انس ابنك واحد منهم بايه بلسان الام؟؟
ربنا يحفظكم وربنا ينصرنا ان شاء الله يا اجدع شباب خلوا بالكم من انفسكم اللى قتل مرة حيقتل الف مرة عارفين لو محصلش قصاص كل واحد حياخذ حقة بيده.. ليه؟ لانه عارف انه ممكن يتحبس كم سنة ويخرج لازم يكون فية حكم رادع للقتلة اى انسان يزهق روح بغير حق واجب فيه القصاص ده حكم ربنا
13\كلمه تقوليها لنجوم الاهلى ولو تحبى تخصى حد فيهم ؟؟
كنت عايزة اعرف لو كان الالتراس ماحمكمش وكم واحد منكم مات كنتوا حتعملوا ايه ؟؟؟حتنسوا وتلعبوا بالسهولة كده؟؟!!والله انس كان بيحبكم ويحلم بيكم وكم انس فى الالتراس حلم بيكم!!
14\امنيه نفسك تحققيها وكانت امنيه انس ؟؟
كان نفسه يلعب فى الاهلى وفعلا كان بيتدرب في الاكاديمة بس ربنا مأردش له يكمل سبحان الله
انس الله يرحمه هدومه حمرا من حبه فى الاهلى سريره مكتوب عليه الاهلى كراساته واقلامه من الاهلي ستورز كل يومين يروح يسال امتى التي شيرت الجديد هينزل؟؟ بس امنيته راحت معاه
ولوحكيت للصبح ماهقدر اقولكم كان ايه الاهلى عنده حتى مدخل الشقة راسم شعار الاهلى
مرة حلم في رمضان في الجامع نعس بين الاذان والاقامة انه واقف فى مكان عالى وكل اللاعيبه بتسلم عليه وجماهير الاهلى بتشاور له من بعيد
سبحان المكان العالى الشهادة و اللاعيبة عزت فيه وجماهير الاهلى حبته ودعت له لانه محبوب جدا
و قد كان اوصى الشهيد "انس محي الدين" الذي لم يتجاوز الخامسة عشر من عمره، بأن تخرج جنازته من ميدان التحرير، وأن يصلى عليه في الميدان، كما أوصى بتكفينه بعلم مصر، وأعلن رغبته في التبرع بقرنيتيه لمصابي الثورة الذين فقدوا أبصارهم "على أن يكون لكل مصاب قرنية"، فيما طالب الشهيد ذويه أن يتبرعوا بأجزاء جسده، لأي مصاب من مصابي الثورة، قد يحتاج لها.
رحم الله شهدائنا واسكنهم فسيح جناته