الشرنوبي ل"الفجر الفني": أنا ومحمد يسري بنعمل ورشة عمل لذيذة.. وأتمنى عمل ديو مع هذا الفنان (خاص)

طرح منذ فترة الفنان محمد الشرنوبي، أغنية له تحمل أسم "أنتي الحياة" وقد حققت نجاحًا كبيرًا وتفاعل كبير من الجمهور.

وكشف الشرنوبي، في تصريح خاص ل "الفجر الفني"، عن سر الكيمياء بينه وبين الفنان محمد يسري، كما صرح عن السبب وراء حبه الكبير لتقديم كاڤر الأغاني القديمة بصوته.


الشرنوبي يوضح سر نجاحه هو ومحمد يسري سويًا

وعن سر الكيمياء بينه وبين محمد يسري وأسباب نجاحهما سويًا في تقديم الأغاني وآخرها أغنية "أنتي الحياة"، أوضح الشرنوبي قائلًا: "مفيش سر هو إحنا صحاب وأخوات وطول الوقت قاعدين مع بعض، ودماغنا قريبة من بعض فبنعرف نشتغل سوا بشكل سلس وبعرف كمان لو عندي أي تعليق علي حاجة بقوله، أو لو عندنا فكرة بتطلع علطول أو هو يقولي فكرة فنبدأ نشتغل عليها، يعني بنعرف نشتغل مع بعض ونعمل ورشة عمل لذيذة".


الشرنوبي يكشف السبب وراء تقديمه الأغاني القديمة

أوضح الشرنوبي، سبب حبه لتقديم كاڤر الأغاني القديمة بصوته قائلًا: "طبعًا حبي لتقديم الأغاني القديم بصوتي له سبب معين، يمكن أني أكون بحاول أحافظ علي الهوية الموسيقية المصرية علي قد ما أقدر لأنها بدأت تختفي شوية، وكمان لأن الناس دلوقتي مبقتش تقدم نوع مزيكا مصري أو ألحان مصرية، والثقافة المصرية الموسيقية والهوية بدأوا يختفوا شوية فيمكن ده اللي أنا بكون حريص عليه عشان أنا بحب الهوية الموسيقية المصرية وبحب التراث بتاعنا وبحب شكل المزيكا بتاعتنا فيمكن عشان كدة بحاول علي قد ما أقدر أحاول اخلي لسه في وجود للهوية الموسيقية المصرية".


الشرنوبي أريد تقديم ديو مع سميرة سعيد

وكشف الشرنوبي، عن الفنانين الذي يحب أن يمثل معهم وأيضًا عن الفنانين الذي يحب أن يقدم معهم ديو غنائي قائلًا: "مفيش حد معين يعني الحمد لله أنا مثلت مع كل النجوم الكبار وطبعًا كلهم كانوا مميزين ومهمين جدًا بس مثلًا أتمني أشتغل مع كريم عبد العزيز لأني بحبه جدًا.

أما علي الصعيد الغنائي فأتمني تقديم ديو مع سميرة سعيد، وكمان عايز أعمل ديو مع عفرتو".