وجهت الإعلامية أسما شريف منير، رسالة للمطلقات عبر حسابها الرسمي بموقع تداول الصور والفيديوهات "إنستجرام" . فنشرت أسما مجموعة صور لها ولإبنتها، وعلقت عليهم قائلة:" كتير اتقال لي متتكلميش، دي حياتك الشخصية، انتي بتتاجري بحياتك الشخصية ليه؟، خليكي في الميك اپ و حاجات البنات، امسحي الپوست ده، بلاش ملوش لزمة الكلام في الموضوع ده..و عشان كل ده ضد اعتقاداتي و اللي انا مؤمنه بيه كنت بحس اني محبوسه في قالب مش بتاعي، انا بحب اقول اللي حسه بيه و اعبر عن نفسي و اساعد غيري من خلال تجارب حياتي" . وتابعت قائلة :" انا المتابعين ليا النسبة الاكبر ستات و دي في حد ذاتها معادله صعبة عشان ست زيك تثق فيكي و في ارائك و متغيرش منك مش بتحصل كتير، و عشان انا اول ما اتعرفت كان من خلال تجربة طلاقي الاولي، وصلت لقلوب ستات كتير و كسبت ثقتهم و ده كان الدافع الاساسي اني اقدم محتوي يفدهم، كلمة مؤثر مش كلمة سهله و لازم تبقي علي اساس و لازم ابقي قد اني ابقي شخصية عامة و افيد غيري. مش كل الناس قد انها تبقي جريئة و ليها صوت، في ناس بتختار تصدر حاجات ممكن تبقي مش حقيقة بس عشان تتحب و تبان انها شخصية متحققه و سعيده و مسيطره، و تخاف تقول ارئها لحسن تخسر" . أستكملت أسما حديثها قائلة :" انا بقي مش كده، انا عرفت اني ليا تأثير ايجابي علي ناس كتير، انا ليا اثر و رأي و بيتابعني 2 مليون شخص، ده رقم لو شفتوا علي الحقيقة ممكن يغمي عليا، لما اتكلم عن تجربة في حياتي و تساعد ناس تتقدم او تتخطي موقف صعب او تغير تفكيرها بيحسسني بسعادة و نجاح ميتوصفش، فا انا مش هبطل اتكلم و اقول كل اللي جوايا رغم ان في ناس هتفضل فهماني غلط، بس اللي بيفهمني صح هما اللي هفضل اتكلم عشانهم و اساعدهم و اطور من نفسي عشان افيدهم، عفويتي هي سر نجاحي" . أضافت :" موضوع انهارده هو اني انا و ابو بنتي قررنا ننزل نخرج عشان لارا كان بقالها كتيييييير مشافتناش في مكان واحد مع بعض، مشافتناش في كدر واحد مع بعض، و لأ احنا مش هنرجع لبعض و لا مش بنفكر خالص في كده، لان احنا دلوقتي في وضع احسن بكتير، يعني لما كنا مع بعض قررنا اننا منكملش لكن دلوقتي هنفضل في حياة بعض لاخر يوم في عمرنا عشان لارا هتفضل ربطتنا لاخر العمر، بنحترم بعض و عملنا معادلة من اصعب المعادلات في الدنيا و انا فخوره بينا جداً، بلاش محاكم" . وفي نهاية حديثها قالت :" بلاش نقول كلام وحش لاولادنا عن بعض من كتر الغيظ، بلاش اب يقابل بنته في نادي بوقت، والله العظيم كله بيخسر و اولهم ولادنا اللي ملهمش ذنب في اختلافنا، التحضر في الموقف ده بيحافظ علي نفسية طفل يا يطلع سوي يا يطلع معقد، زي ما الام بتخاف علي اكل و شرب و نوم و صحة ولادها والله نفسيتهم اهم من اكلهم و مصارفهم، حتي لو في بينكم بلاوي، بدل ما تحاربوا بعض، اختاروا السلام و خلي كتفكم في كتف بعض عشان الغلابة اللي ملهمش ذنب دول.. خدوا خطوة انهارده عشان قسماً بالله هترتاحوا بقية العمر..شكراً ابو لارا" .
