حوار| "الجبالي" معجزة ألعاب القوى: حققت ذهبية في أول بطولة رسمية.. نفسي أتعين بشهادتي وهذه رسالتي للرئيس السيسي!

بدأت دخول رياضة المعاقين منذ عامين فقط
حققت الميدالية الذهبية في أول بطولة رسمية شاركت بها
في أول بطولة كنت "رايحة لمجرد الترفيه" ورجعت بالمركز الأول
كنت بخاف أنزل الشارع من نظرة الناس
والدي سبب كل اللي انا فيه دلوقتي من إنجازات
محمد صلاح مش بس لاعب كورة ده قدوة لكل الرياضيين

"مفيش حاجة اسمها مستحيل.. لازم يكون عندنا أمل ورغبة في تحقيق الإنجازات".. هكذا بدأت إيناس عبد العال الجبالي عبد العال، الشهيرة ب"نوسة الجبالي"، معجزة رياضية في عالم ألعاب القوى ورفع الأثقال للمعاقين، حديثها الممتع مع "الفجر الرياضي"، وعبرت عن سعادتها بما حققته من إنجازات، متمنية أن تحقق أمنية حياتها بتحقيق ميدالية ذهبية عالمية، وتصبح بطلة العالم، وليست مصر فقط.

في البداية.. نرحب بك يا كابتن نوسة ونهنئك على الميدالية الفضية الأخيرة في رفع الأثقال؟
الله يبارك فيك.. سعيدة للغاية بالتحدث ل"الفجر الرياضي".. وأشكركم على اهتمامكم برياضات المعاقين.

حدثينا عن نشأتك وإلى أي محافظة تنتمين؟
أنا بنت قرية الإسماعيلية مركز كفر سعد التابع لمحافظة دمياط.. وأنا فخور أني بأنتمي لمحافظة دمياط وقريتي التي أدين بالكثير لها ولناسها المحترمين.

كيف كانت بدايتك مع رياضة ألعاب القوى؟
أنا لحد سنة 20 سنة مكونتش أعرف ان فيه رياضة خاصة بالمعاقين من الأساس.. وكنت أدرس في معهد فني تجاري، ولما المعهد اختارني عشان امثله في أسبوع شباب الجامعات روحت وكان مجرد أني رايحة للترفيه.

حدثينا عن أجواء هذه التجربة؟
كانت تجربة مختلفة.. حققت في المشاركة دي المركز الأول على مستوى الجمهورية في ألعاب القوى في رمى الجلة.. الحكم أول مشاف مستوايا قاللي انتي لو مدرب المنتخب شافك مش هايسيبك إلا لما يضمك ليهم.. الكلام ده فرحني أوي خصوصا أني دي أول مرة كنت اشارك.

ماذا حدث بعده هذه البطولة؟
والدي بدأ يهتمي بيا من الناحية الرياضية وتعب معايا أوي وانا فخور بوالدي جدا.. لأني قبل كده كنت بخاف أنزل الشارع من نظرة الناس ليا.
المدرب صبري البرعي أول ما شافني خدني وقدملي في الاتحاد ومن هنا بدأت مسيرتي بجد بشكل رسمي.

برغم التألق الذي ظهرت عليه كابتن نوسة.. لماذا لا نراها في ناد كبير؟
أنا لاعبة في جمعية الرياضيين لمتحدي الإعاقة بدمياط .. اتعرض عليا نوادي كتير بس رفضتهم عشان أنا عاوزة ابقى في جمعية الرياضيين.. وعاوزة كل زميلاتي والأبطال يبانوا ويظهروا في الجمعية زي ما انا ظهرت وطلعت كده.

ما البطولات التي حصلت عليها كابتن نوسة؟
حصلت على الميدالية الذهبية في ألعاب القوى (بطولة الجمهورية – كأس مصر)
وحصلت على المركز الاول والميدالية الذهبية في بطولة الشركات ببورسعيد بس باعتباري تابعة للشرقية للدخان.

ما هي حكايتك مع رفع الأثقال؟
شاركت في بطولة الشركات الأخيرة في رفع الأثقال ودي أول مرة ألعب رفع أثقال وحصلت على المركز الثاني فيها واتعرضت للظلم لان وزني 32 كيلو وشاركت في وزن 41 كيلو ورغم كده حققت تاني ورفعت 45 بفارق 2 كيلو فقط عن صاحبة المركز الأول.. الناس هناك مكنتش مصدقة أني بأرفع أثقال.

ما هو حلمك الذي تريدين تحقيقه في المستقبل؟
نفسي أحقق الميدالية الذهبية في رفع الأثقال على مستوى العالم.. وأصبح بطلة العالم في رفع الأثقال وان شاء الله هاحقق حلمي عشان مفيش حاجة اسمها مستحيل.

ما الرسالة التي تودين أن تبعثي بها ولمن؟
الرسالة دي حابة أوجهها للرئيس عبد الفتاح السيسي حابة أشكره جدا على دعمه للرياضة ولرياضة المعاقين بالذات.. خاصة وانه خلى 2018 عام ذوي الاحتياجات الخاصة، وكفاية أني بقيت بطلة في عهده.
ونفسي أن ربنا يستجيب دعائي وأقدر أتعين بشهادتي خاصة أني خريجة معهد فني تجاري، وورقي موجود عند المسئولين وده حقي.
وكمان حابة أشكر كل المدربين اللي دربوني واللي أشرفوا عليا وخلوني أوصل للمستوى ده.

هل يقوم الإعلام بدوره نحو رياضة المعاقين؟
أكيد فيه قصور من الصحافة والإعلام ناحيتنا.. الصحفيين والإعلاميين مش بيحضروا ولا بيهتموا بالبطولات اللي بنشارك فيها ولازم يكون فيه اهتمام أكتر من كده.

سمعنا أنكم تحضرون لحدث فريد في مصر أكتوبر الحالي؟
بالفعل فيوم 25 أكتوبر الحالي هو اليوم العالمي لقصارى القامة "الأقزام" في العالم، واحنا طلبنا من وزير الرياضة وقدملناه طلب عشان نتجمع في المدينة الشبابية بشرم الشيخ.. ونقدر كمان نحتفل ونهتم باليوم ده.

هل تشجع كابتن نوسة كرة القدم؟
أكيد بشجع كرة القدم.. أنا أهلاوية جدا وبحب محمد صلاح عشان مش بس هو لاعب كورة وكمان أخلاقه وهو قدوة لكل الرياضيين.

ما الرسالة التي تودين توجيهها للمنتخب الوطني قبل مباراة الكونغو يوم الأحد المقبل؟
ربنا يوفقهم ويسعدونا ونوصل كاس العالم بعد 28 سنة من الغياب.

أخيرا.. رسالة أخيرة من كابتن نوسة.
أتمنى أن يكون لينا ممثل في مؤتمر الشباب ويكون لينا دور وصوتنا يوصل للرئيس عبد الفتاح السيسي.. كمان نفسنا يكون لينا عريبات عشان احنا بنتبهدل في المواصلات.