تامر حبيب: شيرين مش غلطانة وأنا من جمهور عمرو دياب

قال السيناريست تامر حبيب، إنه تعرض لهجوم بعد دفاعه عن النجمة شيرين عبد الوهاب بعد أزمتها مع النجم عمرو دياب.

وكتب تامر عبر حسابه على موقع التواصل الاجتماعى "فيسبوك": "من ساعة ما كتبت بوست بقول إني مش شايف إن شيرين عبد الوهاب غلطت خالص في دعابتها في قرطاج وهي على المسرح, وأنا بيجيلي رسايل من ناس بتشتمني والغريب إن كلهم بيقولولي يا حرامي السيناريوهات وكأنهم حافظين المصطلح سوا وكلهم برضه بيقولولي عمرو دياب سيدك انت وشيرين".

وتابع: "طبعًا أنا بحاول أكون مؤدب ومنقلش كلامهم وشتايمهم اللي هما قايلينها.. طيب هو أنا جبت سيرة عمرو دياب من قريب أو من بعيد؟ أنا شخصيًا بحب الراجل ومن جمهوره من قبل ما حضراتكم تتولدوا واللي يعرفني عارف كده كويس وأولهم عمرو دياب نفسه.. جميل إنكم تتحمقوا عشان خاطر نجمكم الكبير قوي، واللي هو أكيد أكبر وأكثر احترامًا من سبكم وألفاظكم النابية بس الأجمل إن يكون عندكم مخ وتمييز الأول".