نصائح بسيطة لمفهوم صحي أفضل

كلنا أما بنيجي نسمع جملة هناكل أكل صحي بيجي في دماغنا حاجات معينة زي صور السوتيه، الفراخ المسلوقة، البيض المسلوق، شوربة الخضار، الجوع، الجوع والجوع، وعلي الرغم ان فيه مننا كتير بيحب أنواع الأكل دي بس معظم الناس رابطاهم بالجوع والمرض، ليه بيحصل ربط بين الحرمان وفكرة الحياه الصحية؟، ليه ميتربطش كلمة الحياه الصحية بالرياضة مثلا، الأكل بأنواعه المختلفة اللي بيحتاجها الجسم سواء كان مسلوق ولا حتي محمر والبعد عن الضغوط النفسية أو التعامل معاها بشكل صحيح.
الحياه الصحية مش حرمان ومرض لكن هي تعود علي أساليب حياه أفضل تخلي الواحد حاسس بإن جسمه أفضل، معدته خفيفة ووشه حتي أصفي.
وعشان كده في المقال هنا هقترح عليك بعض الأكلات الصحية اللذيذة للفطار والغدا وكمان هيكون فيه بعض النصائح البسيطة والمهمة للناحية الجسدية والنفسية لكل شخص وده عشان الحياه الصحية مش بس بتخليك تمارس الرياضة وتاكل كويس لكن المفروض تخلي عقلك ايجابي أكتر وكمان بتساعدك انك تشوف نفسك أفضل.
1. حاول تاخد كل يوم ساعات نوم كافية ما بين 6 ل 8 ساعات فتكون صاحي عندك الطاقة الكافية لإنك تقضي يومك كله بنشاط.
2. ركز علي فكرة ان متسربعش نفسك في الفطار عشان زي مابتسمع ان الفطار هو أهم وجبة في اليوم, وعلي حسب ما قالته أخصائية التغذية باربرا شمديت ان الفطار الصحي بيتكون من البروتينات والنشويات وجنبها لازم يكون فيه بعض الدهون الصحية، وقالت إن البروتين بيدي الاحساس بالشبع وانه ليه وظيفة في عمليات الجسم الحيوية وان النشويات بتدي طاقة كبيرة للجسم وانها بتساعد في عملية الهضم.
وقالت بردو ان الشخص العادي الي مش بيمشي علي أي رجيم لازم ياكل ما بين 350 ل 500 سعر حراري في الفطار عشان الجسم ياخد الطاقة الكافية اللي هو محتاجها.
ومن الأكلات اللذيذة علي الفطار الحمص المهروس مع الزبادي وزيت الزيتون، وهي تحتوي علي 350 سعره حرارية، والطبق ده بنحضره بسهولة بنسلق كوباية إلا ربع من الحمص ونحط عليه علبة زبادي كامل أو خالي الدسم ومعلقة زيت زيتون صغيره, وممكن بردو تجرب علي الفطار الشوفان مع اللبن والفواكه.
3. اشرب مية كويس علي الأقل 8 كوبيات مية يوميا, المية ليها فوائد لا حصر لها لو قعدنا نتكلم عن فوائدها مش هنخلص انهارده.
4. اتمرن بشكل يومي علي الأقل 15 دقيقة، مش لازم تجري ممكن تتمشي بدل أما تركب حاجة ومتكسلش تطلع سلم أو تنزله, متخافش لو ابتديت تتمرن وتعبت في الأول ده عادي هتتعب في الأول قوي لكن بعد كده هتحس بالفرق الكبير علي جسمك وصحتك.
5. بطل أكل لما تحس بالشبع, مش لازم تكمل طبقك أو انك تقوم مع الناس اللي بتاكل معاك لإن الأكل الكتير ده بيخلي جهازك الهضمي مش مظبوط. وكل عادي وجبات صغيره كتيره مش لازم تلات وجبات اساسين, كل لما تحس بالجوع وبطل أكل لما تشبع, الوجبات الصغيره دي بتساعد علي توزيع الطاقة علي جسمك علي مدار اليوم.
ومن الأكلات الصحية اللي ممكن تاكلها علي الغدا سلطة الفراخ المشوية, وهي بتحتوي علي 300 سعر حراري للشخص الواحد, والوجبة دي تكفي 4 أشخاص وهقولك بتتعمل ازاي:
تتبل 400 جرام فيليه صدر دجاج بمعلقة كبيره من صلصة الصويا ومعلقة كبيره من الزيت ومعاها فص توم ورشة بابريكا ونحطها تتشوي من الناحيتين, وبعد كده تحط عليها فلفل اسود وتقطعها لشرايح طويلة بعد الشوي, نجيب خس وجرجير ونحط عليهم بصلة متقطعة شرائح و1 أفوكادو(مكعبات) وعدد 1 طماطم متجففة متقسمة لأربع حتت ونحطهم في طبق كبير وتحط عليهم نص كمية الدريسنج وبعد كده تحط الفراخ وعليها النص التاني من الدريسنج ومن فوق تحط معلقتين كبار من جبنة البارميزان, والدريسنج بتاعها متكون من معلقة زيت زيتون, معلقتين خل, عصير برتقال (نص برتقالة), نص معلقة صغيرة من المستردة ورشة ملح وفلفل.
6. حاول تبعد عن الكافيين والصودا, هم غير انهم مضرين جدا وان الصودا علي وجه الخصوص بتسبب زيادة في الوزن لكن هم كمان بيزيدوا من معدلات إنتاج البول.
7. اخرج علي الأقل مرة في الاسبوع وابعد عن الروتين والشغل, شوف الشمس وغيًر جو بعيد عن جو المكاتب, ده هيبقي مفيد ومجدد لطاقتك بشكل مستمر, متحاولش تضغط علي جسمك ونفسيتك عشان ده مش مجدي تماما.
8. ابعد الناس السلبية من حياتك, انت محتاج ايجابية عشان تعرف تتعامل مع أي مشكلة تقابلك, مش هتعرف تدي طاقة غير أما تاخد طاقة, متسيبش حد في حياتك سلبي لأنه بياخد طاقة منك بس.
9. حاول تدي وقت للقراية مش لازم يوميا بس علي الأقل اسبوعيا حتي لو هتقرا وانت في المواصلات, هتديك ثقة أكتر في نفسك وفي رأيك.
10. البس لبس ملون واتبسط, انفخ بلالين وطيرها, اركب عجل, اجري وألعب, اعمل اللي يبسطك وسيبك من كلام الناس, حب نفسك, صدقني نفسيتك هتبقي بصحتها مع الألوان والبعد عن التفكير في رد فعل الناس أو كلامهم هيكون ايه.

ولو نفسك في طاسة او حلة أو عجلة أو حتى كتب ممكن تدخل من علي موقع yaoota.com وتدور وتقارن وتشتري كل اللي نفسك فيه .

ياقوطة هو محرك بحث إلكتروني بيساعدك توصل لآلاف المنتجات من أجهزة إلكترونية موبايلات وملابس وأجهزة وأدوات منزلية وبيساعدك تقارن اسعارهم من أكتر من 100 محلات أون لاين في مصر وكمان تقدر تشتري وانت في مكانك من غير أما تتحرك.