4 تكليفات عاجلة من السيسي لقيادات بالجيش ووزير الصحة.. وقصة "اللواء بهاء" مع الرئيس

اليوم كان شاهدًا على افتتاح الرئيس عبدالفتاح السيسي، المرحلة الرابعة من أعمال التحديث والتطوير في المجمع الطبي للقوات المسلحة في كوبري القبة، لم يقتصر حفل الافتتاح على قص الشريط من الرئيس، والاستماع لشرح حول تلك الأعمال، لكنه شهد كواليس وسياسات جديدة تكشف نية الرئيس لتطوير القطاع الطبي.
"عاوز أوصل لنتائج تحليل محترمة"
أثناء شرح العقيد أحمد محمد رئيس فرع المعامل التشخيصية، المرحلة الأولى لأعمال تطوير معامل القوات المسلحة والبحوث الطبية وبنك الدم، قاطعه الرئيس، قائلًا: "هل ده أكتر حاجة نقدر نعملها؟"، ليرد مدير المعامل بالرد: "المرحلة القادمة من التطوير، لعمل منظومة لربط أكياس الدم منذ خروجها من المستشفى وحتى وصولها للمريض، وذلك يستلزم تطوير أسلوب وأسطول نقلها، والكثير من العمل حتى يتم مراقبتها جيدًا، بتكلفة حوالي 40 مليون جنيه".
قال الرئيس على الفور: "طب تصدق يا فندم.. أنا عاوز أوصل إلى نتائج تحاليل محترمة، لا يستطيع مكان بالعالم التشكيك في نتائجنا.. أنا كنت باعتلك رسالة من سنة ونص، وصلتك يافندم؟"، رد المسؤول "وصلت"، ويستكمل الرئيس قائلًا: "لو كنت قلت وقتها إنك محتاج المبلغ ده كنت صدقت، عشان نختصر الوقت.. بعد لما حطينا إيدينا فى الشغل، أصبح منظومة الصيانة اللي تعاقدنا عليها 3 سنوات، مش هندفع فلوس صيانة لمدة 3 سنوات، بدل سنة واحدة قديمًا".
مسؤول الأمن: "بناخد فلوس على انتظار السيارات.. والرئيس: "ده مهم"
عرض مسؤول مفرزة الأمن، أعمال تطوير ساحات الانتظار، وسأل الرئيس اللواء هارون أبوسحلى مدير مجمع كوبري القبة الطبى العسكري، "هل بناخد فلوس على انتظار السيارات في تلك الساحات؟"، ليرد اللواء هارون: "نعم يا فندم"
ويقول الرئيس: "مهم جدًا إننا ندور على مصدر دخل للمشاريع اللي بنفتتحها، عشان أحافظ على الخدمة اللي بتتقدم للناس، لازم أفكر أجيب الفلوس إزاي، عشان نعمل إحلال وتجديد لازم فلوس، مش هنقول ال 3 أو 4 جنيه انتظار السيارة عبء على المواطن.. لأ.. دي ظروف دولة وبلد ظروفها صعبة، لازم كل واحد فينا يمد إيده يحط حاجه.. الرفق مش إني أقول مفيش رسوم، ولكن الرفق هو تقديم الخدمة على أعلى مستوى، وتقدم لكل الناس، بأقل تكلفة ممكنة".

السيسي يطالب "الصحة" بطرح عدد من المستشفيات الحكومية التكاملية للبيع
سأل الرئيس عبدالفتاح السيسي، وزير الصحة عن المستشفيات المتكاملة على مستوى محافظات الجمهورية، مضيفًا: "لو قدرنا ندخل القطاع الخاص أو المجتمع البدوى، ناخد منهم رسوم المستشفى وإقامتها، ومستلزماتها، والفلوس دى نتفق معاهم إننا نقدمها كعلاج للناس".
وأضاف الرئيس: "لو مستثمر عايز ياخد مستشفى 100 سرير، أو مؤسسة الأورمان أو مصر الخير، ياخدها بمقابل مثلا مليون أو 2 مليون، والرقم ده نعمل آلية ونظام، يقدر المواطن العادى من خلاله إنه يتعالج بيه".. ليرد وزير الصحة "إحنا شغالين فى ده يا فندم".. ويقاطعه الرئيس "لأ أنت تيجيلى وتقولى عندنا كام مستشفى وعملنا فيها إيه، عشان ميجيش حد يقول إننا عندنا مستشفيات مش شغالة ومش مجهزة.. لازم نعلن للناس إحنا بنعمل إيه، وشغالين إزاى.. هاتلى منظومة وعدد مستشفيات نقول إنها اشتغلت ونعلن للناس خلال فترة كذا تكون خلصانة".
"خدوا اللواء بهاء قدوة".. رسالة من الرئيس للمستشفيات الحكومية والجامعية
قال الرئيس عبدالفتاح السيسي: "نرجع لمنظومة الصيانة والإحلال، الخدمة الطبية بتتكلف كتير جدا، اللي بيتحط من موازنة الجيش كتير، ولكن لازم ندور على زيادة الموارد"، ليرد اللواء بهاء زيدان مدير أحد المستشفيات بالمجمع الطبي بكوبري القبة، "يا ريس إحنا اشترينا 700 ماكينة لغسيل الكلى من وزارة الصحة وأخدنا عليها ضمان 5 سنوات، وبعد السعر الجديد للدولار، خدناها بتمن زي ما خدناها من سنتين"، ليرد الرئيس: "يعني لو كانت ب100 دولار دلوقتي إنت خدتها ب50 دولار بس"، ليجيب اللواء بهاء: "أيوه يا فندم".
ويستكمل الرئيس: "ده واحد ضابط حط جهده وإرادته وضميره بذل جهد وقرر إنه يعمل ويحقق حاجه للبلد مش بس للجيش، أنا بقول الكلام ده عشان يكون في كل المستشفيات، الجامعية وغيرها، وكل القطاعات.. في الأخر أنا بطلع الدولار ده من فلوس مصر، لو أقدر أعمل بسعر مخفض للكل، عشان نقدمها بصورة مخفضة للناس".
السيسي: "صدقي صبحي صعب أوي.. وممكن كليات الطب المدني تستفيد مننا"
قال السيسي: "فين مدير كلية طب القوات المسلحة.. فين اللواء أيمن.. سيادة اللواء أنا محتاج أرفع مستوى التعليم مع جامعات من الخارج، ويدينى ترخيص بمزاولة المهنة.. وكمان محتاج إننا نطلع طلاب الكلية للدراسة في الخارج.. وعايز اعرف قدرتنا إيه على استدعاء مدرسين من الخارج، يشتغلوا مع مدرسينا هنا".
ويرد مدير الكلية: "إحنا بنتعاون في مجال البحوث العلمية وأرسلنا 2 طلاب للصين، و2 آخرين في الولايات المتحدة الأمريكية، وحصلوا على المركز الثالث في مؤتمر للبحوث العلمية، ووزير الدفاع قام بتكريمهم"، مضيفًا: "كما أننا أرسلنا 15 طالبًا لمدة شهر للدراسة بالولايات المتحدة، ولدينا فترة تعايش 2 طلبة لمدة أسبوع مع جيش الدفاع الياباني، و2 آخرين بالهند.. كما أن لدينا تعاون مع الدول العربية، وأرسلنا 30 طالبًا لجامعة الشارقة مقسمين على أكثر من مجموعة، وسنرسل العام الدراسي الأكاديمي المقبل بعثات لإنجلترا وأمريكا".
وتابع: "لدينا مدير التعليم الطبي إنجليزي من أصل مصري، وتم اعتماده منذ يوليو الماضي، كما أن لدينا 12 خبيرًا عملوا 14 ورشة عمل لأساتذة الكلية، لكي يتم تدريسه للطلبة بعد ذلك، كما أن لدينا 2 من الطاقم الطبي حصلوا على درجة ماجستير التعليم الطبي من إيرلندا، كمنحة مقدمة من الشيخ القاسمي حاكم ولاية الشارقة، كما أن لدينا تعاون مع إحدى جامعات إسكتلندا، ونطور الكلية، وتم الاتفاق مع اللواء كامل الوزير رئيس الهيئة الهندسية للقوات المسلحة على تكوير المعامل والأبنية التعليمية"، ليرد السيسي فورًا: "أنا مصدقلك على أي حاجة تعملها، وده تصديق مفتوح بس خلّص.. أنا عارف إن الفريق أول صدقي صبحي صعب أوي"، ليضحك جميع الحضور بالقاعة.
وأضاف الرئيس: "إحنا عايزين نقول للناس إن المصريين قادرين على أي حاجة، ودورنا الإعداد الجيد للجيل الجديد قبل ما نخرجهم، وفكر الكلية هو إعطاء الفرصة والسماح باستضافة الكليات المدنية في نظام شبه عسكري، لكي تضخ المنظومة أفراد للقطاع المدني، إحنا في مستوى جيد في مصر وعايزين نزود المستوى اكتر، وعملنا نقلة.. ممكن كليات الطب في القطاع المدني تستفيد مننا وإحنا نستفيد منهم".