بالفيديو.. خالد صلاح ل«أديب»: إنت قليل الأدب.. والأخير: «متخلنيش أتكلم عن علاقتك بالشاطر بلا قرف»

نشبت مشادة كلامية بين الإعلامي عمرو أديب، والكاتب الصحفي خالد صلاح على الهواء، بعد كتابة الأخير مقالاً ينتقد التقصير الأمني في حادث تفجير فندق العريش، ووضع موقعه الإخباري صورة له على مقاله وهو يضحك، قائلًا: "شايف صورتك وإنت عامل إزاي وانت بتضحك على الحادث وده مش توقيته وأنا زعلان وقول لنفسك ياأخي إنت عامل خناقة بينك وبين الشرطة والجيش".
وتابع "أديب"، خلال تقديمه برنامج "القاهرة اليوم"، المذاع على فضائية "اليوم"، اليوم الثلاثاء: "مينفعش الكلام ده يتقال في ليليتها ياخالد صلاح"، ليرد عليه الكاتب الصحفي: "إنت مش واخد البرنامج لحسابك وأنا من حقي أرد ومتزايدش عليا في الوطنية واحنا لازم نواجه اخطائنا، ولو كل واحد فينا مسك للتاني مش هنخلص".

واستطرد "صلاح" في الرد علي الاعلامي: "أنا من حقي أرد قانونيًا ومهنينًا "، لينفعل عليه أديب: "إنت بتفهم حاجة في المهنية ياخي"، ليرد عليه "صلاح": "لا كده مش هقبل كلامك وهفهمك غلط، ومفروض التدابير الامنية كانت تبقى أكتر من كده على الفندق اللي حدث فيه التفجير".
واستمر عمرو أديب منفعلاً قائلاً: "إنت حاطط صورة ليك في الموقع بتاعك وانت بالضب بتضحك يبقى اتكلم عن المهنية"، ليرد عليه خالد صلاح: "ده تجاوز وخروج على الأدب وقلة أدب وغير مقبول"، ليعقب عليه أديب: "قلة أدب تقبلها ولا متقبلهاش بلا قرف بقا تعبنا منكم البلد مش ناقصة ومتخلناش نتكلم عن علاقتك بخيرت الشاطر بقا"، ليزداد غضب خالد صلاح قائلاً: "إنت أكتر واحد عندك أخطاء وبلاوي سودا متخلناش نتكلم عن بلاويك".