بالفيديو| أديب لخالد صلاح: «بلاش قرف إنت وموقعك».. ويرد: «بلاش مزايدة»

هاجم الإعلامي عمرو أديب، اليوم الثلاثاء، الكاتب الصحفي خالد صلاح، بسبب تصريحات الآخير عن التقصير الأمني في حادث سيناء، قائلًا: «اللي ميشوفش يبقى أعمى القلب مش العنين، إنت مبتشوفش يا خالد؟ حرام عليك يا راجل، يا أخي نخلي عندنا دم، نحس بقى يا أخي، البلد مش مستحملة خالص، يا أخي عيب والله، مش عارف إنت بتعرف تقرأ ولا لاء».
وأضاف أديب، خلال برنامج «القاهرة اليوم»، عبر فضائية «اليوم»، «يا أخي عيب كده يا خالد، لازم يكون في حدود عن كده، الإرهاب مستنى ده، عيب يا حبيبي، متكبروا بقى يا جماعة، البلد مش مستحملة، هو في أكتر من كده، نعمل إيه يا أخي، حتى الموقع بتاعك معندهمش مسئولية وحطين لك صورة وإنت بتضحك، فين المهنية، بلاش حتى يا أخي في يومها تهاجم».

فيما رد خالد صلاح على أديب، خلال مداخلة مع برنامجه، «كان ممكن أرد في حتة تانية لكن أصرت أرد هنا»، فرد أديب: «رد في حتة تانية يا أخي»، فعلق صلاح: «يا عمرو بلاش تزايد على وطنيتي، وبلاش نمسك لبعض على الوحدة،قرائتك غلط، وأنا من حقي أرد»، فقال: «أنا مش بزايد بس ده كلام مستفز، دي صورة تحطها في الموقع وانت بتضحك والناس ميتة، يا عم ده أنت رئيس تحرير، وبعدين إنت مش داخل على الهواء بمزاجك، ما أنا اللي مدخلك»، فرد صلاح: «دي مهنية كده؟»، فرد أديب: «وإنت اللي عندك مهنية يا راجل».
فقال صلاح: «ده نقد جارح وتجاوز وخروج عن الأدب»، فرد أديب: «إنت متقيمنيش.. أما تعرف تبقى رئيس تحرير موقع ابقى تعالى اتكلم عن المهنية، وأنا مؤدب ومهني أكتر منك، تقبلي كلام ولما متقبلهوش، بلاش قرف، متخلينيش أتكلم عن علاقتك مع خيرت الشاطر وأفتح ونطلع القديم».