"غنيم" يطرح 5 أسئلة هامة على المصريين قبل التفكير في التغيير

قال الناشط السياسي وائل غنيم، إنه بعد سقوط الرئيس الأسبق حسني مبارك وعلى مدار سنتين ونص (من 2011 ل 2013)، شاركت مع كثير من الشباب في حملات ومبادرات للحوار والتواصل بين مختلف الأطياف، قابلت عشرات الشخصيات السياسية بما فيهم قيادات الجيش والإسلاميين والليبراليين واليساريين والشباب في اجتماعات كانت أحيانا تستغرق ساعات طويلة أتاحت لي التعرف على الجميع بعيدا عن صخب الإعلام.
وأضاف خلال صفحته على "فيس بوك": وللأسف مع الوقت بدأت أشوف صورة تانية خالص غير صورة الحلم اليوتوبي اللي الناس عاشته في ميدان التحرير، صورة المرة دي أكثر واقعية وقتامة من حلم المدينة الفاضلة اللي حلمنا بيه في 25 يناير.
واستكمل غنيم سرد الأحداث عقب ثورة يناير، مضيفا: لكن وللأسف بعد تنحي مبارك، اشتعلت الخناقة على تقسيم التورتة، وطفت على السطح الصراعات الأيدولوجية اللي اتخذت منحى المعارك الصفرية، متابعا: لو عايزين نقيم دولة العدل، لازم نبقى صريحين مع نفسنا، الأفكار والأيدولوجيات اللي متبنيها الكتلة الحرجة من الفاعلين سياسيا في مصر بعضها تتعارض مع المفاهيم الأساسية للحرية والديمقراطية. بدون الاتفاق على مراجعات حقيقية هيستمر الوضع المؤسف اللي احنا بنعيشه حاليا.
وتساءل غنيم: هل ممكن نعيش في مجتمع قائم على التعددية يستوعب الناس على اختلافهم، مجتمع فيه ديمقراطية حقيقية (مش إجرائية) قائمة على تداول السلطة وحماية حقوق الجميع وخاصة الأقلية؟ ، هل ممكن نعيش في دولة دور جيشها هو حماية الحدود والعمل تحت مظلة السلطة المنتخبة من الشعب ومش بيتدخل في السياسة ولا يدير منظومة البلد الاقتصادية؟
هل ممكن نعيش في دولة لا يحاول سياسيوها فرض نسق أخلاقية وقيمية على الأفراد تحت شعارات الدين والوطنية؟ هل ممكن نقبل بفكرة إن معتقدات الإنسان وأفكاره هي حق أصيل يخصه وحده؟ هل ممكن نعيش في دولة فيها احترام حقيقي لحق الإنسان في الاعتقاد والتعبير والتفكير؟، مختتما: هل ممكن نعيش في دولة "عدل" و"قانون" و"حرية"؟