نجل "إبراهيم يسري" بعد نشر صورة نادرة معه: تعلمت منه الأخلاق الحميدة

نشر محمد يسري، نجل الفنان الراحل إبراهيم يسري، عبر حسابه الشخصي على موقع التواصل الاجتماعى "فيسبوك" صورة نادرة تجمعهما، مؤكدًا أنه تعلم منه الأخلاق الحميدة.
وتذكر نجل إبراهيم يسري موقف جمعه بوالده عندما كان طفل صغيرًا، حيث كان وقتها يبلغ من العمر 14 عامًا وحدث أن أخطاء في زميلة له في المدرسة وكان قد سمعه والده فنهره وطلب منه عدم تكرار ذلك مرة ثانية، مؤكدًا أنه تعلم منه الأخلاق الحميدة.
حيث كتب علي صفحته يقول:"الفراق صعب علي اللي عايشين بس" جملة سمعتها من واحد قاعد في المستشفي لما شافني شايل ابويا وداخل اغسّله ومن ساعتها وهي بترن في ودني.. ممكن ناس كتير تشكك في مصداقيتي لو اتكلمت عن ابويا لكن بصراحة دي اخر حاجة ممكن أفكر فيها لإن ربنا وحده اللي عالم ان كل كلمة بكتبها دلوقتي مش هتوفي الراجل ده حقه.. وانا مش بتكلم عن الفنان، لإنه زي اي فنان بيمتهن الفن لا يمكن الناس كلها تجتمع عليه وأكيد هتتفاوت درجات حبهم ليه.. اما الانسان ف ده موضوع تاني خالص.. ومن نعم ربنا علينا انه الحمد لله حبب ناس كتير فيه وكلهم بيشهدوا بأخلاقه حتي لو علاقتهم بيه بس من خلال التلفزيون.. كل اللي يعرفوني كويس عارفين اننا عيلة صغيرة اوي وعلاقتنا قوية اوي ببعض وده كله بفضل ابويا وامي برغم ان والدي فقد والديه وهو طفل صغير واللي ربته كانت اخته الله يرحمها.. وكانت نتيجة ده انه كبر هادئ الطباع، بيحب خصوصيته جدًا، عاشق للقراءة، بيكره الصوت العالي وبيحافظ دايما علي حدود الاحترام في التعامل مع اي حد بغض النظر عن مكانة الشخص ده سواء في الوسط الفني او في الحياة العامة".
وتابع:"وانا طفل عندي 14 سنة كنت واقف في المطبخ وابويا الله يرحمه كان موجود وسامعني وانا باتكلم في التليفون وانا اهلي كانوا معودني اني أتكلم واقول اللي انا عايزه قدامهم عادي ومخافش لأَنِّي لو خفت ابقي بغلط، المهم انه سمعني وانا بقول علي واحدة معانا في المدرسة انها سخيفة اوي وبعد ما قفلت التليفون جابني وقعد يتكلم معايا وطلب مني اني عمري ماتكلم علي حد من ضهره واني حتي لما اكبر وأتعرف علي حد عمري ماتكلم علي أسراره او عنه أبدا مهما كان غلطان فيا.. كانت هي دي اخلاق ابراهيم يسري.. عاش رجلا باخلاق الفرسان النبلاء حتي وان لم تكن تلك سمات زمنه ورحل عنا تاركا سيرة طيبة.. الفراق فعلا صعب علي اللي عايشين بس.. بس لما بيكون حد ربنا محبب فيه الناس بالشكل ده بيبقي الفراق صعب اوي".
الجدير بالذكر، أن الفنان إبراهيم يسري رحل عن عالمنا يوم ميلاده، وذلك بعد تدهور حالته الصحية في الفترة الأخيرة، مما ادى إلى نقله إلى العناية المركزة، ولم يمر ساعات على ذلك وتوفاه الله فى 20 أبريل الجارى.