أنا كنت مخطوبة لمدة أسبوعين، وماكنتش عاوزة الشخص ده؛ بس علشان كنت لسه صغيرة فبالنسبة لي كانت فرحة، كان عندي 19 سنة، لكن ماكنتش باهتم خالص بالشخص اللي كنت مخطوبة له، ومع ذلك هو كان بيحبني جدا؛ لدرجة إنه كان بيقول لي بحبك دي قدام أي حد، وفي أي مكان ومع إن عمري ماخرجت معاه أو أي حاجة من دى يمكن حبه ده هو اللي خلاني أزهق منه. فسخنا الخطوبة والحمد لله؛ مع العلم إني كان بيجيلى ناس كتير أوي وأنا بجد ماكانش في دماغي، لحد ما في الشهر اللي فسخت فيه اتخطبت لشخص تاني خالص؛ واحد حبيته من أول ما شفته، حسيت إن هو كل حاجة مع إن أول مرة شفته فيها فضل يتريق عليّ، وأنا ماكنتش طايقاه؛ مستغربة إنه جاي يشوف عروسة وبيتتريق عليها، مش عارفة اتشديت له إمتى وإزاي. واتخطبنا لمدة 8 شهور، واتجوزنا، ماكنتش أتخيل أبدا إني هافرح بالشكل ده. مشكلتي مش في كده، مشكلتي إنه من الصعب يقول كلمة حلوة؛ مع إني باكون شايفاها في عينيه؛ بس هو صعب أوي، وبيغير عليّ موت من أي حاجة؛ حتى من أقرب الناس، هو ابن وحيد والباقي بنات، وكلامه قليل جدا، مع إن جواه كتير؛ بس مابيريحنيش. looma