أمير طعيمة يكتب: سنة 2005 كنت أول مرة أقابله فيها

خلال دقايق كنت اقتنعت بنسبة مليون في المية بموهبته كملحن، و خلال شهور عملت معاه اغاني كتير كملحن نجحت بشكل رائع، كنت من الناس اللي شايفين انه لازم يغني و كنت بحس في صوته بتميز و احساس غريب و اخدنا الطريق من اوله بداية من اغاني عملناها علي اليوتيوب او اغاني سنجل، كان طريق مش سهل بس اصراره كان بيخليني واثق ان فيه نتيجة كبيرة هتحصل للمجهود ده .
وفي اللحظة اللي بكتب فيها الكلام ده اكتشفت اني عملت معاه كمطرب 23 أغنية بصوته، 6 أغاني في ألبومه الأول و 9 أغاني في ألبومه اللي نزل النهارده و 3 اغاني في شخبطة ع الحيط ده غير اغاني سنجل من يوم فراقك و تعرف و الا دي و بحبك ليه و افهمي .
لما بشوف دلوقتي قد ايه بقي بالقوة دي كمطرب و عنده ما شاء القاعدة الجماهيرية الكبيرة دي بحس باحساس ممكن اكون مش قادر اوصله كويس، بالنسبالي هو مش مجرد مطرب أو ملحن اتعاملت معاه و نجحنا سوا، ده مشروع ابتدي من الصفر لحد ما بقي كده، ده اخويا الصغير و شخص ابن ناس بلاقيه جنبي في وقت الأزمة قبل وقت الفرح. و انسانيا و فنيا بقي ليه رصيد كبير جدا عندي .. مبروك يا صاحبي و كل خطوة بتاخدها لأدام أنا بفرح بيها، انت تستاهل كل خير.
عن رامي جمال أتحدث.