مصر بنت محجبة ولابسه محزء وحاطه ميك اب كثير. ترقص وتضحك وتحب وتبوس حبيبها في السر. رنة موبايلها دعاء، بتقرا القران قبل ما تنام، وبتصلي قبل امتحاناتها. هدفها الوحيد تتجوز، لو الحجاب هايجبلها عريس هاتلبسه ولو اتاكدت انه هو سبب عدم جوازها ها تفكر تقلعه. بعد الجواز هدفها الوحيد ما تطلقش، مع أنها هي اللي بتصرف ع البيت وجوزها نايم طول النهار، بس حاسه أنها من غير راجلها واللا حاجة، فاشلة حتى لو مسكت القمر باديها. بتخاف من العيب أكثر من الحرام وبتحب موبايلها أكثر من صحابها. ساعات بيكون نفسها تدين أكثر بس مش قادرة وساعات بيكون نفسها تتحرر أكثر بس مكسوفة. صراعها بين امبارح كابت على نفسها ومش قادرة تصدق انه كذبة وبكره خايفة منه حتى لو متاكده انه ها يكون أحلى. متلخبطة ومتشتته وبتبص في المرايا مش عارفه تميز انعكاسها، مستنية كلمة حلمة أو حتى بصة علشان تحب نفسها وده سبب كرهها لنفسها. حلها جوا عقلها وقلبها بس هي لسة مستنياه ييجي من حوليها وبرا منها. كل ما بتشوفها من بعيد بتكون عايز تكرهها بس بتصعب عليك، عارف أن معاناتها مش باختيارها بس مش قادر برضه تستسلم لفكرة أنها هي الضحية. وشكلها كده هاتفضل تعبانة، وتعبانا معاها.