كل مرة بكتب فيها مقالات للستات المرة دى بكتب للرجالة ومعملتش كدة غيرللشديد القوى.. عاوزة اقول لكل راجل (اشترى منى) دة أنا خايفة عليك وعندى زيك وفى خطر كبير على حياتك من مراتك عاوزة أقولك ع المؤشرات اللى لما تظهر ف بيتك تعرف انك بتلعب ف عداد عمرك أسمعنى كويس و طرطئلى ودانك لما تلاقى مراتك مش طايقة حد يكلمها وبتطلع همها ف العيال و بتزعق بمناسبة ومن غير مناسبة وبسبب ومن غير سبب ولما تلاقيها اهملت صحتها و شكلها و بقت تعمل م الحبة اؤبة على كل كلمة واى كلمة معاك ولو حسيت ان ملهاش نفس تتحرك من ع الكنبة اللى زى ما يكون لزقت فيها و لما يبقى وراها مليون حاجة تعملها و مبتعملش منها ولا حاجة ولما بتبقى ايامها كلها شبة بعضها و ضغطها طالع نازل زى الاسانسير وصداع دائم ف دماغها عامل زى دق الهون ولما تبقى عاملة زى اللى خلاص قربت تمشى بكرسى بعجل و طول الوقت حاسس انها بتلف حوالين نفسها وتنسى الاكل ع النار لحد ما يبقى فى سحابة سودا فالمطبخ من الدخان ولما تروح لحد الثلاجة وتنسى هى كانت عاوزة تجيب منها اية ولما اسماء العيال تدخل ف بعضها و تناديهم باسماء بعض وتبقى حسة انها على طول مظلومة و ضحيتك انت و العيال 0 لما تحصل كل الحاجات دى تبقى اللمبة الحمرا نورت ف بيتكم وتبتدى تخاف على نفسك بعد كدة وتبقى وا ثق انك قربت على مرحلة الساطور الأكياس السودا.
فأحسن لك تشترى نفسك بخروجة حلوة او بسهرة وعشا رومانسى او هدية شيك او مكالمة تليفون زى بتوع زمان او كلمتين غزل زى اللى كنت بتقولهم على موزز التلفزيون ولو عاوز تعتق نفسك بجد يبقى بلاش سرمحة بعد الشغل جرى ع البيت بدرى وبلاش سيرة اصحابك اللى هى مش طايقة تسمع سيرتهم.
أنا بقى ح اسيبك تجرب وتبقى تدعيلى لأنى انقذتك من حاجات كتير اوى لو عاوز تعرف اية هى الحاجات دى متخدش بنصيحتى وجرب وانت تعرف و ساعتها ح تعرف قيمة كلامى وتحذيراتى ليك وحاول تاكل عيش ف بيتك احسن لك وربنا يسترها عليك و علينا (واى خدمة يا عم ).
