بنقول على ده .. عمو

يو سف ابنى 3سنوات ومتاخر فى الكلام وسالت حضرتك عن حالته قبل كده وطبقت بعض من افكار حضرتك وجابت نتيجه هايله الحمد والشكر لله بس انا مستعجله عليه جدا
وما بين الامل والرجاء انا ووالده نمشى فى تدريبه وبالنسبه لفكره الميكرفون انا استفدت انى ادربه على الالوان من اول سؤال حضرتك حطيته فى المقال
والحمد لله بقى عارف الوان كتير فاضل اعرفه الارقام وده ان شاء الله انا موش قلقانه منه والقصص برضه جابت نتيجه بس
عايزه اعرف من حضرتك ازاى اوصله ان فلان دكتور او فلان مهندس او مدرس اوعامل الخ وده علشان اجابه السؤال اللى حضرتك حطيته فى المقال اللى هو لما اكون تعبان اروح لمين؟ وكمان المشكله الحقيقيه معايا انه موش قادر فعلا يعمل جمله حتى من كلمتين بس املى فى ربنا
ثم توجيهات حضرتك وطبعا لا اوفيك الشكر ابدا ابدا لذلك جزاك الله خيرا عنى وعن كل الناس المستفيده جعل الله ذلك فى ميزانك ان شاء الله
فضفضة
اولا مش مهم يفهم اسماء المهن المختلفة والمهم بالدرجة الأولى هية الحاجات اللي بيشوفها لكن مفيش مانع هقوللك تعملي ايه , هتمثلي له قصة انك عيانة وانك دكتورة او تجيبى ادوات الدكتور ودي موجوده كتير فى محلات الالعاب ، كمان كلمة (ابلة) أو ( ميس ) مهمه عشان لما يروح الحضانة فاعملى تمثليه على دي كمان ، (البياع) كمثال تفهميه اننا بنقول عليه (عمو) ، والباقى هو هيعرفعه بنفسه شوية شوية خاصة لما يروح المدرسة ، أما عن الكلمات والجمل علميه الجملة السهلة مع الجملة الطويلة السهلة ، بعدين جمل زي كرة كبيرة وكرة صغيرة وباب احمر ساعة خضرا وهكذا ، كمان جمل زي اشرب ميه العب كرة وروح باي ، اكتبي الجمل ولازم يكون بيعرف كلام الجمل متستخدميش كلمات جديدة عليه غير حاجات بسيطة ، وان شاء الله هتلاقى الطريقة دي سهلة وبسيطة ومجهودها قليل جدا وشكرا لك.