زوج المشاغب

مساء الخير على الجميع ..
الرسالة دي للستات اللي بيمروا بنفس اللي هحكيه ده .. البيه جوزى عامل شغب معايا وعايش في دور فالنتينو وكل يوم والتاني اسمع مكالمة ليه على الموبايل وهوة قاعد جنبي .. كمان شفته جرأة أكتر من كدة ؟!!!! هوة بيكلم واحدة ست وعشان حظه النيلة صوتها بيبقى طالع برة السماعة والمهم بعد ما يقفل واواجهه يكدب كدب الدنيا والآخره ويصر على انه بيكلم واحد صاحبه او زميلة في الشغل .. المشكلة اني مش قادرة امسك عليه حاجة اكتر من كدة بس مسيره يقع في شر اعماله .. المهم دلوقتي الحل ايه خصوصا اني متأكدة ان ده حال الكتير من الستات ولموضوع بقى مشتفز , فأرجوا كل القارئات اللي مروا بنفس الظروف لكن وصلوا لحل يعلقوا على موضوعي .. عشان أستاذة نيفين دايما حيادية وبتطبطب ماتزعليش مني يا استاذة بس انت نموذجية والنوع ده من الرجالة عايز حد لبط عشان يسلك معاهم .. جتهم القرف كلهم .. يلا سلام دلوقتي وانتظروا مني الكتير من النوع ده من المشاكل اصل جوزي والحمد لله دايما فارسني.
بوبا
فضفضة
يا أستاذة بوبا .. ضحكتيني .. بس والله انا مش بطبطب دايما وكنتي هتلاحظي دة لو قرأتي بعض الموضوعات بتاريخ قديم شوية .. عموما ما تزعليش يا ستي خدي فرصتك كاملة وفضفضي براحة راحتك مع صحباتك على فضفضة وما يجراش حاجة لو تقبلي رأي الرجالة بتهيألي هيبقى أفيد عشان هيبقى الرد بدماغ راجل بس اتمنى اللي هيرد يبقى صريح ويقول رأيه في جوزك بصراحة .. إنطلقي بقى يا بوبا .