اجمل حالة صلح !

السلام عليكم جميعا ،
كان عندي مشكلة خطيرة والحمد لله ربنا الهمني بحاجة كانت سبب حل المشكلة وحبيت اعرضها للكل يمكن تساعده في حل مشاكلة أو على الأقل الكل يشوف ازاي ان اللجوء الى الله هو الملجأ الوحيد لنا أولا وأخيرا ، انا عندي 26 سنة والحمد لله بصلي مش بسيب فرض ومداومة على الدعاء وعائلتي كمان نفس الحكاية لكن زينا زي كتير من الناس ممكن بيتهم يتعرض لازمة أو مصيبة أو مشكلة كبيرة وأنا مشكلتي كانت ان والدي ووالدتي بعد عشرة سنين طويلة ربنا أراد ان يحصل بينهم مشكلة كبيرة نتج عنها أنهم فكروا في الطلاق ، انا اتصدمت طبعا لأني مش متوقعة أبدا حاجة زي كدة خصوصا أننا عيلة كان بينضرب بيها المثل في السعادة والهدوء لكن معرفش مشكلة أهلي بدأت من امتى لأني فجأة لقيتهم بيبلغوني انا وأخواتي بالموضوع ده ولاني أكبر أخواتي اضطريت أقوم بدور المصلح لكن فشلت لأني كمان معرفتش المشكلة اللي بينهم على إيه أصلا .. المهم فكرت كتير لكن ما وصلتش لحل ومحبتش حد من العيلة يتدخل ما كنتش حابة مشاكلنا يشوفها حد ، فضلت أيام كتيرة افكر وفي يوم جيت أصلي وفي السجود قعدت ادعي لعيلتي بصلاح الحال والهداية وأثناء السجود خطر على بالي اطلع في الغرفة اللي جنب الصالة اللي همة بيبقوا قاعدين فيها وصليت ركعتين لله دعاء بصلاح الحال لكن المرة دي في السجود دخلت في حالة من العياط هيستيرية وفضلت ادعي ربنا لامي وابوية بالهداية وصوتي كان مسموع ليهم وفضلت اتوسل الى الله انه يشيل عننا الغمة دي ومن كتر العياط بصوت عالي أبوية قام من مكانه من الخوف علية تقريبا اتخض ولما دخل علية وأنا حسيت بيه كملت دعاء واترجيت ربنا انه يرجع البيت ده تاني زي ما كان وكتير من الدعاء ، أبويا لما سمعني حسيت بيه قعد على ركبته جنبي فختمت الصلاة وبعد ما قعدت على الأرض للتشهد وخلصت لقيته حضني جامد وابتدى هوة كمان في البكاء لحد ما صوته اتحاش وقاللي انا أسف انا معرفش انك مجروحة اوي كدة انا أسف لأني في لحظة ما عملتش حسابك انتي واخواتك وفي لحظة الشيطان غلبني فعلا ، سكت فجأة وفضل باصصلي انا ما اتكلمتش خالص لكن حسيت انه ممكن أقوم بدور أخير رحت قمت واخدت أيده ورحت بيه عند أمي وبرضه وأنا ساكنة فضلت بصالهم همة الاتنين .. لقيته راحلها قومها من مكانها وشدني وحضنا احنا الاتنين وسيبتهم بعدها بشوية يتعاتبوا .. وفعلا الحمد لله رب العالمين انتهى الموضوع تماماً واتصافوا همة بمعرفتهم ورجعت عيلتي تاني بفضل ربنا وعشان كدة انا اصريت أبعت مشكلتي يمكن تفيد الكل وهية أكيد هتفيد الكل .. وأرجوكم اللي مش سعيد في حياته لأي سبب وخصوصا لو عنده أولاد ارجوكم تفكروا كتير في مصير الأولاد دول همة مالهمش ذنب خالص وذنبهم الوحيد أنهم أولاد الناس دول .. ياريت كل الناس تفكر كتير لان خراب البيت مش على الزوجين بس ده على الأولاد اكتر .. يارب أكون أفدت الجميع والحمد لله على كل شئ وشكرا .
أريج
[email protected]