" استانلي زمان جدي "

احمد شاكر

استانلي زمان جدي
الصورة دي بتقول حاجات مهمه اوي . اه والله اوي
اهم اربع حاجات فيهم .. حاجتين .. لبس البنت
البنت كانت بتلبس اقل من دلوقتى وواخده حريتها اكتر , ومع ذلك
لا كان فيه معاكسات ولا تحرش .. ودا يثبتلنا ان المشكله مش فى البنت
علي قد ماهي مشاكل نفسيه عند الشباب , وزيادة معدل السيكو حناكة فى دم كل سيس مما ينعكس
بالسلب ع الموزا اللى نازله تهزر والدليل قالولو

تاني حاجه بقا ودي التالته
ان العاده المنيله بتاعت المصريين موجوده من قديم الازل
صورني والنبي وانا مش واخد بالي
يعني المشكله مطلعتش فينا
طلعت وراثه من تيتا الحاجه


......رابع حاجه ودي الخامسهان ستانلي زمان كان زحمه فش
ودا يمكن لانه كان شاطىء مجاني .. مش زي دلوقتى
ولاد اللذينا عملوا التذكرة بتمنيا جنيه
غير الكراسي طبعا وكانة الكولا
يعني عشان تقعد نص ساعه ع البحر
تطلع صارفلك بتاع متين جنيه
وخناقتين وشبشب مسروق



سابع حاجه بقا ودي التامنه
ان الكباين كانت شغاله وكان فيه امان
دلوقتى بيتهيألي لو شغلوها خمس دقايق
شارع الهرم كله هيجي يصيف فى استانلي

تاسع حاجه بقا ودي العاشره والاخيره
ان اللى كانو بيروحوا استانلي
ناس من اهل المنطقه .. الاسكندرانين الاصليين
دلوقتي للاسف بقت مستعمره اقليميه
الاسكندراني من دول في الصيف مبيعرفش
يتحرك سنتي فى مكانه .. لحمه في كل حته
لا عارف يمشي لا علي بحر ولا ترام ولا حتي فى شارعهم
لدرجة انه لو زهق وفكر يطلع يشم حبة هوا في بلكونته
ساعات بيلاقي ناس جوا !!