اما نقول زمان يبقي المقصود بالكلمة زمان اوى اوى وزمان القريب اللي مبقالوش كتير ده اصل انا زمان اللي حضرته يدوبك كده يعمل يجى 10 سنين 15 سنة انا مش قديم اوى يعنى ممكن اكون مترب وكده بس اهو كله بيطلع في الغسيل ... المهم اللي يدقق هيلاحظ الفرق تيجى نركز؟؟ زمان اما كنا في ابتدائي ولا اعدادى وروحت مكتبة عشان تشتري كشكول ولا كراسة كان بيبقي مكتوب في دهرها نصائح ارشادية ..اغسل يديك قبل الاكل وبعده..... لاتؤجل عمل اليوم الي الغد....طاعة الوالدين من طاعة الرحمن وغيرها من النصائح اللي كانت بدب في روحنا الحماس والحفاظ علي النصائح الغالية دى النهاردة بقا ياسيدى هات كشكول من اقرب مكتبة او ابعد مش هتفرق واقلبه علي دهره احتمال متلاقيش حاجة مكتوبة بس لو حظك حلو وجبت اللي مكتوب عليه هتلاقي مكتوب.. ارشادات ... كلمة نصيحة اختفت تحس اصلا من لفظ ارشادات كده بالصرامة والعنف في التعامل لدرجة انك تكره تكمل مكتوب بعدها اية بس لو بالك طويل زى حالاتى هتكمل وتلاقي الارشادات كالتالي... المخدرات من المحرمات فابعد عنها...السجائر تبدأ بنفس وتنتهي بعادة او الي ادمان المكيفات... وطبعا بعد ماتزهل هتسئل نفسك سؤال هو اول ما يطرأ علي بالك "هو اية اللي حصل" رغم انها ارشادات ولكنها كارثة والله كارثة حقيقية هو ده الخطاب الموجه الي اطفالنا يعنى خلاص؟ معتش ينفع معاهم النظافة من الايمان واغسل يديك.. يبقي احنا اكيد في مرحلة خطرة ...اما واد ابن عشر سنين نقوله كخ ياحبيبي المخدرات وحشة معنى كده انها شايعة جدا مع الملاحظة ان ايامنا برضه كان فيه مخدرات بس كنت اشوفها في الافلام بس مش علي النواصي...! اما سيد درويش غني اغنيتة القديمة اوى اوى اللي كانت بالسودانى باين"" ايه ايه امان امان فين المصري بتاع زمان" رغم ان الراجل الجميل ده توفي سنة 1923 يعنى داخل علي قرن اهو احنا برضه لسه بنسئل فين المصري بتاع زمان؟؟ تقريبا طول عمرنا بندور عليه وشكله كده مكنش فيه مصري اصلا...! الحمار...زمان كان بيتركب بس وعمره ما اتسلطت عليه اضواء الشهرة اما دلوقتى اتغناله..اصلنا بقالنا قرنين بنغنى للحب ولمشاكلنا عايزين ننوع...عمنا سيد درويش عمل نهضة فنية اما جيلنا عمل نهضة حمارية بالذات ان اتغنى للبانجو والحشيش والمحششين وواحد تانى بينده علي واحد اسمه " علي" طول الاغنية ومش بس الحمار اللي بقا نجم لا والحنطور كمان عشان دوره في امتاعنا لانه بيحنطرنا ...! زمان ...كان ممكن ترجع من المدرسة تلاقي الحاج اسماعيل جارك قاعد مع ابوك وبليل تلاقي الست الوالدة عند طنط هنية جارتنا والناس مع بعض في كل حاجة يزعلوا سوا ويفرحوا سوا اما دلوقتى بيتك فيه عزاء واجب لميت طازة والبيت اللي جنبك بيجوز ابنه في نفس اللحظة! زمان لو راكب اتوبيس وست او بنت ركبت الرجالة مهما كبر سنهم يقفوا ويقعدوا الستات مكانهم اما دلوقتى بقا الراجل زي اللطخ قاعد وعامل فيها نمساوى ولا بيقوم ولا بيتحرك ولو اتجرأت وعاتبته يرد بكل وقاحة ويقولك " وهي اية اللي منزلها من بيتها تستحمل" او " انا جاي الاول" او ممكن يقوم للبنت عشان يضبط معاها واخد بالك يا حاج محمد؟ زمان كنت تسمع عن واحد ناجح بدأ من الصفر وبقا فوووووق اما دلوقتى غير اننا بنبدء من تحت الصفر وبنستقر في النهاية عند الصفر تحديدا الا لو ربنا كرمك وبقيت عضو مجلس شعب! زمان كان اللي بيعانى من الغلو الطبقة الكادحة.. دلوقتى وشرفك كله بيشتكى ! زمان كان الشاب من دوول يجري ورا بنت حاسس انها فتاة احلامه ويحارب وتختاره هي من بين كتير متقدمين دلوقتى برضه بتختاره بس من غير ما يحارب لان تقريبا مفيش غيره اتقدم...! زمان مكناش نسمع عن تحرش جنسي فردى في الشوارع دلوقتى بنسمع عنه لا واية جمااااااااعى! زمان كانت البنت المحترمة محترمة واللي مش تمام معروفة دلوقتى متعرفش تفرق اصلا مع احترامى لكل بنت محترمة لان اللي مش تمام عايشين حياتهم بس من تحت لتحت علي امل يتستروا ! فيه فروق كتير اوى بين زمان ودلوقتى وربنا يحنن قلوب الناس ويهدى كل البنى ادمين ويريحنى من الدنيادى قبل مايبقي دلوقتى زمان والمستقبل دلوقتى والحياة تتغير للابشع لاننا علي الاقل جيل هيعرف يكمل حياته علي ذكري جميلة...
