مشكلتي بدأت من مدة طويلة لما جوزي قرر ينام لواحده في السرير في غرفة تانية بحجة انه قرا على النت يارب يقطع النت واللي اخترعه ان الانفصال في السرير بيجدد إحساس الزوجين ويخليهم يشتاقوا لبعض وان الفكرة دي هتساعد في قتل الملل والخرس الزوجي ،، ومن ساعتها والخرس الزوجي اللي بيقول عليه انتشر وبقى خرس وحرمان وملل وخناق ونيلة ، نفسي افهم دلوقتي انا المفروض اعمل ايه ؟! انا اتكلمت مع جوزي بالحسنى وكان رده السكوت خاااالص اكني بطلب منه اشنقه .. يا جماعة يا رجالة أرجوكم حد يقول حاجة ولازم الكل يعرف ان الموضوع ده يغضب ربنا يبقى أزاي زوج يمتنع عن زوجته أيا كانت الحجة وعادي جداً مطلوب من الواحدة الصبر أو السكوت ؟ يبقى محدش بقى يسال أو يستغرب من المصايب اللي بنسمع عليها ماهية كلها بتيجي من الهم والقرف ده !! يا أستاذة نيفين ارجوكي ناشري رسالتي دي وأنا بدعو السادة الرجالة يردوا على زميلهم في الجنس اهو راجل زيهم ويقولوا ده حله ايه ؟ إياك نفهم وشكرا جزيلا وآسفة لو طولت . ج . م [email protected]