السلام عليكم ورحمة الله كيف حالك أستاذة نيفين أرجو ان تكوني بخير ، اسمحيلي ادخل في الموضوع .. انا عندي ولد وبنت عمر الولد اربع سنين والبنت سنتين وللأسف جوزي معاملته مع ابني وحشة جداً وبيتعامل معاه بعنف غريب وأكنه عدوه كلمته كتير في الموضوع ده وقلت له ان الضرب وسيلة غبية ومضرة بنفسية الطفل خصوصا أننا ممكن نتعامل بشكل ارحم من كدة والمشكلة ان الولد أصلا هادي بطبعه يعني مش زي الأولاد اللي بشوفهم والموضوع دلوقتي اتحول لمشكلة أكبر هي ان ابني بدا يحصل له تبول لا إرادي اول ما يسمع مفتاح أبوه فتح باب البيت الولد صعبان علية جداً قلبي بيتقطع عليه وبطلت اقدر على جوزي وخناقاتنا بقت كبيرة بسبب الموضوع ده والغريبة ان البنت بيتعامل معاها عادي أو يمكن عشان لسة صغيرة .. وأنا دلوقتي مش عارفة أتصرف وعلى فكرة أهل جوزي نفسهم بينصحوه دايما بتغيير معاملته لابني ووالدته وصل بيها الحال لانها قالتله انت خسارة فيك نعمة ربنا دي وان الأولاد زينة الحياة الدنيا والناس بتجيب أطفال عشان تربيهم مش تعزبهم لكن للأسف ولا اكن امه اتكلمت في حاجة وهموت واعرف سبب القسوة دي ايه ؟! أرجو النصيحة أو الحل سريعا لان ابني حالته بتسوء يوم للتاني وشكرا جزيلا . ح . ع فضفضة محررة الصفحة .. نيفين حجازي سيدتي الفاضلة .. يمكنك الذهاب بابنك لطبيب ليبدأ معه العلاج الذي يتناسب مع سنه وحالته وليخفف عنه اثار معاملة والده .. وفي الوقت نفسه ستسالين الطبيب عن الطريقة أو الحيلة التي تمكنك من إقناع زوجك بان لديه مشكلة تستدعي ان يذهب بسببها الى طبيب أيضاً .. وتواجهيه بمشكلة ابنه وانه ان ظل على هذه الطريقة سيخسر ابنه تماما فالمشكلة من عنده بدات ثم انتقلت بالتبعية بسوء المعاملة الى الابن .. و ان استطعتي إيجاد الشخص الذي يثق به زوجك من أقاربه أو أقاربك ولديه القدرة على التأثير عليه سيكون وجوده إيجابيا في البداية مع ضرورة الذهاب الى طبيب .. واصبري على مشكلتك و بإذن الله تعالى ستعود الأمور الى طبيعتها