باسل النجاريكتب : هل حقآ فشلت الثورة ؟؟

إن كنت من عينة الناس الي يقال لهم " خربتوا البلد " " بص يا عم الثورة بتاعتك جبتلنا أية !! " " ثورة أية يا بني ما خلاص ألاخوان ركبوا علي البلد " " مبروك الثورة فشلت " فهذه المقالة لك و أن كنت من الناس الي بتقول هذه التشجيعات و الجمل الرائعة أحب اقولك المقالة دي لك برضه ( مع العلم أن الثورة دي مش بتاعتي و حياة أمي ) و لكن هل حقآ فشلت الثورة ؟؟

نعم فشلت !! حال البلد زاي ما هو و الناس لسة فقيرة و لسة في طوابير عيش و غاز وكل حاجة بتغلى , الناس مش لاقيها تاكل , و مفيش أمن و العربيات بتتسرق ( منهم عربيتي ) و غير كدة ألاخوان هما الي ماسكين البلد !!! علي الاقل مبارك كان بيعمل كل دة بس كان اشيك و في هيبة كدة و تحس أنه مسيطر شوية مش الي أنتوا جبتوا دة . فان كنت تري بهذا المنظور فالوضع اسوء بكثير !! سيناء الي مات فيها كثير من الشهداء بتروح مننا تاني و الاقتصاد بيضيع و تجار الدين في كل مكان بيكفرونا و بيطلعوا عين الي جابونا و الدستور بيطبخ و غير كل دة قرارات عشوائية من حكومة
. عشوائية مثل تضليم المحروسة من الساعة العاشرة

و لكن خليني اقولك أن الثورة كانت زاي العاصفة الي بتشيل تراب من علي بلد مدفونة في التراب من عصور و كل الفكرة أن العاصفة دي شالت التراب عن بلاوي سودة لا حصر لها و كل يوم بتبين قد أية مصر كانت في عمق غريب من السرقة و النهب و العك . خليني اقولك أن البلد طول عمرها ملاينة فقر و جوع و طوابير بس دولقتي حاسس بيها أكتر لأن ماحدش بقي بيسكت علي حقه و ظهرت وسائل اعلام حرة تقدر تفضح و بقي كل واحد مش عاجبه حاجة بيقولها من غير خوف حتي لو عارف ان مش هايبقي في أمان بس الثورة كسرت الخوف الي جواه المصري . عمرك كنت تتخيل أن مصري يروح قدام القصر الجمهوري و يقول لرئيس منتخب فين حقي !! عمرك كنت تتخيل أن شباب قاعدين علي القهوة بدل ما كانوا بيتكلموا في الهلس و في الكورة بيتكلموا في السياسة و في مصير البلد و بيشتموا في الرئيس عادي !! أحب اقولك أني سعيد بتكويش ألاخوان علي كل شئ و بغبائهم الغير طبيعي , لأن وصول الاخوان ألان للحكم يجعلهم كارت محروق في المستقبل ( تخيل أن أيام مبارك كانوا بيقولوا أن الاخوان معارضة مع أنهم طلعوا ولاد عم... الفرق الوحيد حبة شعر ) , و أن اي حاجة بتحصل في البلد هايتحملها ألاخوان قبل اي حد لانه الحزب الحاكم و لما تتقلب التربيزة هاتتقلب علي ألاخوان . فارجوك فكر قد أية الثورة اظهرت البلد علي حقيقتها و أظهرت عمق القذارة الي كنا عايشين فيها . و أنك ما ينفعش تحكم
. علي الثورة لأن الثورة ليست في الحكم و لم تكتمل بعد


أما انت أنا عارف قد اية اتحملت تهزيق و اهانة ليك و للثورة الي ممكن تكون أحلي حاجة عملتها في حياتك و قد اية دخلت في مناقشات مع ناس من وجهة نظرهم " فيها اية لما يموتوا ؟؟ " أية اللي وداها هناك ؟؟" " البلد دي متجيش غير بالضرب و الشتيمة " و كنت بتسكت في الأخر لأنك مش مصدق أن تفكير الناس وصل لهذه الدرجة من عدم ألانسانية . و كثير من الوقت كنت بتفقد ألامل في الثورة و و تقول البلد خسارة فيها الشهداء و تبدأ في فقرة أكتئاب و لكن سريعآ ما بتقوم نفسك و بتحلف أن حق اخوك مش هضيع كدة . أفقد ألامل في الثورة لما الالتراس ينسي حق أخواته , أفقد الامل في الثورة لما يمسحوا جرافيتي محمد محمود و الناس تقول ماخلاص , أفقد الامل في الثورة لما و احد يتحبس ظلم و مايلاقيش دعم من الناس
. حتي لو ناس قليلة , افقد الامل لما نبطل نفتكر الشهداء و نبطل نكرمهم . فارجوك لا تفقد الامل لانك أمل هذه البلد

في النهاية , ان كنت ضد الثورة أو مع الثورة فاعلم أن الثورة كانت حتمية بس أحنا كنا متفائلين زيادة لنتائجها مع علمنا ان مصر طول عمرها مدفونة
." في التراب و عارف ان الجملة الاخيرة ها تعصب ناس كثيرة بس " الثورة مستمرة